2235/2024-2025

26th September, 2024 : Vawiin khan Education Complex Conference Hall, Mc Donald Hill-ah Education Consultant Rev Dr K.Thanzauva Office hawn a ni a, School Education Minister Dr Vanlalthlana, Power & Electricity Minister Pu F.Rodingliana, Pu Lalchhuanthanga MLA leh ZPM President Pu Lalliansawta ten an hmanpui.

School Education Minister Dr Vanlalthlana chuan he hunah hian thusawiin Mizoram sorkar hnuaia department lian tak enfel ngai apiang enfela rawtnate siamtu tur Consultant Rev Dr K.Thanzauva a awm ta chu lawmawm a tih thu a sawi a. Consultant chu mi chak, zirna lama tawn hriat nei tha leh tui tak a ni a ti. Minister chuan Mi harsa zawk te kan dawm kang dawn a nih chuan zirna siamthat chu a bulpui a nih thu a sawi a. Zirna siamthatna kawngah tha nia an hriatah chuan huaisen takin an kal zel dawn a, dawihzepa pen ngam loh an tum lo tih sawiin an tisual palh a nih pawhin an insiam tha zel dawn a, tha nia an hriatah chuan an kal zel dawn tih a sawi. Dr Vanlalthlana chuan an kal zelna turah thurawn erawhchu an mamawh tih sawiin thurawn hi an ngaisang a, a theih chuan ziakin nise, consultant pawh thurawn pek a ngai a ni a ti. Minister chuan, “Mizoram hi kan tu leh fate tana luah tlaka kan siam a ngai a, i tangho zel ang u," a ti bawk.

Power & Electricity Minister Pu F. Rodingliana pawhin thusawiin Education Consultant Rev Dr Thanzauva te nupa chu he ram tana mit tui tlaa tawngtai thei an ni a, ropui a tih thu a sawi a. Ram tan theih tawp chhuah an tum tih sawiin, an hnathawhin par a la chhuang lo erawhchu a buaithlak lai tak a ni a ti a. Zirnaah zirlaibu chhut atangin bul tan that an duh thu leh a chhutnaah pawh party-in hlawkna nei lovin chawi belhin chhut hna thawh a ni a ti a. Krista Lal ram tundin thupuia neitu an nih thu leh zirna atanga chu chu tihhlawhtlin tum a nih thu a sawi bawk.

Rev Dr K.Thanzauva chuan zirna tihhmasawn nan curriculum leh syllabus chu mithiamte nen siamthat tula a hriat thu te, Minister-in zirtirtu lak leh chher kawnga hma a lakna chu a ngaihhlut thu te, school leh chenna in leh Kohhran hmun hma hmasawn dan chu a khairual lo hle nia a hriat thu te, school thenkhat dinhmun chu kum tam tak kalta a mi ang reng a la nih thu leh hmasawn a tul thu a sawi bawk.

Consultant office hawnna hi Pu Lalsangliana, Director, School Education-in a kaihruai a, Rev Dr. R.L Hnuni'n hunserh a hmang a, Higher & Technical Education Department leh MBSE aiawhten thu an sawi bawk. Consultant Office hi Samagra Shiksha office chhawng chung bera awm a ni.