2234/2024-2025

Dated Kolasib the 26th September, 2024: Vawiin khan Kolasib DC Conference Hall ah District TB Forum chu an Chairman Pu Robert C Lalhmangaiha,  Kolasib DC hovin an thukhawm a, TB forum hmalak  tawh dan leh chak zawka hmalakna kalpui dan tur an rel a ni.

Thutkhawmnaah hian Chairman, Kolasib DC, Pu Robert. C Lalhmangaiha chuan thu sawiin, India sawrkar chuan 2025 ah TB umbo a tum a, chuvang chuan he umbo hna thawk tur hian theihtawp kan chhuah theuh a ngai a ni, a ti a. Chu mawhphurhna chu TB Forum chungah a innghat lian hle a, chuvang chuan TB dona kawnga an thawhna ah tan la turin a chah.

Dr RK Lalthlamuana Sr CMO pawhin thu sawiin, TB chu natna darh awlsam tak a nih avangin a zawnchhuah leh enkawl hna pawh uluk leh fimkhur taka kalpui ngai a ni, a ti a. Kumin August thla thleng khan Kolasib District a VC 56 zinga VC 30 te chu TB free village ni thei tura eligible an la ni, a ti a. TB free village a puang tur hian mi 1000 ah mi 30 tal test an ngai a, chung zinga 1 aia tam TB vei an awm chuan TB free village a puan theih an ni lova, chuvang chuan theihtawp chhuah a tanlak lehzual a ngai a ni, a ti.

Dr Saichhingpuii Sailo, Member Secretary,  District TB Forum chuan District TB forum dinchhan leh a hnathawh tur tlangpui tarlangin vawiin thutkhawmna a thurel turte sawizauna hun a hmang a. Vawiina thutkhawmnaah hian TB chungchanga hma lak dan tur ngaihtuahin Kolasib district chu TB Free District a nih theih nan District chhunga khaw hrang hrang Village council te kaltlangin TB chungchang inhrilhhriatna neih nise tih te, Home dept enkawl lai district jail, 1st IR Battalion Hq Mualvum te, Vairengte a IR duty te leh Excise duty te zingah Awareness neih nise tihte, hei bakah hian TB vei mek ten treatment an lak laia eitur tha an neih theih nan Nikshay Mitra (Community support of TB Patients) atam thei ang ber an awm theih nan Kolasib khawpui chhunga Office hrang hrangah ngenna siam nise an ti bawk.

Kumin chhungin Kolasib district ah TB vei rinhlelh mi 1703 sample test niin, TB vei hmuhchhuah mi 144 an awm a, tun dinhmunah Kolasib district ah TB vei enkawl lai mi 94 an awm mek a ni.