2233/2024-2025

Champhai, 26th September 2024: Vawiin chawhnu dar 02:00 khan DP&AR Minister Pu K. Sapdanga hovin Champhai District-a Head of Office te chu DC Conference Hall, Keifangtlangah an ṭhu khawm.

Pu K. Sapdanga chuan Champhaia sawrkar hotute nen inhmelhriatna leh thawhhona ṭha neih a duh avangin he hun hi buatsaih a nih thu a sawi a. Head of Office te chu Mizoram run mek tu ruihhlo dona kawngah theihtawp chhuah pui turin a ngen a, “Ruihhlo chu thil kalphung ve reng tur a ni ti a ngaih liam mai aiin, kan awmna ṭheuh - pisa, kohhran leh khawtlang aṭanga kan do tlan a ngai a ni,” a ti.

Pu K. Sapdanga chuan dan lova kuhva lakluh do kawngah pawh sawrkarin theihtawp a chhuah zel dawn a ni, a ti a.  Dan lova kuhva lakluhin a hrin chhuah ṭhalaite rilru tlahniam te, lehkha zir ṭul tih lohna te, sum awlsam duhna te, in hmun lo ram man sang chak lutuk te bakah ram chhunga kuhva chingtu ten harsatna an tawh te titawp turin ṭan lak zel a ngai a ni, a ti bawk.

DP&AR Minister hian Head of Office kalkhawmte chu sawrkar hna hi eizawnna atan chauh ni lo, vantlang rawngbawlna a ngai turin a chah a. A hautak lo zawng, a thawk chhuak tam zawnga hna thawh tum ṭheuh tur a ngenin, “Kan tu leh kan fate seilenna tlaka Mizoram chhuah thei tu in ni tih hre ang che u,” a ti.

Inkawmhona hi Champhai Bawrhsap Pu VL Remliana chuan a kaihruai a. He hunah hian Champhai District chhunga sawrkar pisa hotute an tel tha hle a. Department hnathawh, hmachhawp, hmalakna leh mamawh hrang hrang te sawihoin, hun hlawkthlak tak hman a ni.