943/2024-2025

Dated Aizawl, the 25th June, 2024: Vawiin khan Chief Minister Pu Lalduhoma chuan a office-ah Serchhip Town Development Committee hruaitute a kawm a, Serchhip khawpui hmasawnna tur thil pawimawhte a sawipui.

Leisekawt Field puitlin tura hmalak thu te, Nursing School hman tangkai thu te, Serchhip venglaia PWD hmun luah mek leh Soil Department ram tangkai zawka hman thu te, Eklavya School panna kawng siam thu te, district Jail Improvement thu te an sawi a. Chief Minister hian District Jail sak that nan hian Rs. 330 Lakh SASCI atanga dah a nih tawh thu leh District Jail pariat lai sak that tura hmalak mek a nih thu a lo hrilh.

Chhiahtlang daia Godown sak tawh hman tangkai thu te, Chhiahtlang dai veka ITI Office leh Bukpuia Social Welfare Office a taka hman thu te, Sailiamkawna Mizofed Pump a awm theih nana 132 KV line sawn thu te pawh an sawi a ni.

Chief Minister hmalakna hian Paragliding Take off kawng PCC turin teh mek a ni a, World Cup thlen hma ngeia zawh tur a tih a ni. District Hospital-a Ultrasound chhia chu thlak tura tih mek a ni a, Hospital building thar tur hi a design siam that leh mek niin; CSR sum 21 crore neihsa khan a daih dawn loh avangin mamawh belh hi CSR bawka dap a tum thu Chief Minister hian a lo hrilh bawk.