942/2024-2025

Aizawl, 25.06.2024: Health & Family Welfare Minister Pi Lalrinpuii chuan vawiin chawhma khan Aijal Club ah ‘State Level Buyers-Sellers Meet for Medicinal and Aromatic Plants’ buatsaih chu a hawng. He buyers-sellers meet hi sorkar laipuia Ministry of AYUSH hnuaia National Medicinal Plants Board (NMPB) in a bultumin State Medicinal Plants Board (SMPB), Mizoram, Directorate of AYUSH in a buatsaih a ni. “Forward and Backward Linkage Supply Chain of Medicinal Plants – Under Integrated Component Project” kalpui mek hnuaia buatsaih a ni.

Health Minister chuan thu sawiin, ramhmul damdawi chu hnam rohlu pakhat leh tangkai em em a nih thu sawiin, a tangkaina te haichhuak belh zelin, kuthnathawktute tan leh economy chawikangtu pawimawh a nih theih a beisei thu a sawi a. Vawiina Buyer-Sellers meet buatsaih chuan Mizorama ramhmul damdawi chingtute leh la ching ve duhte tan market tha tak a hawn phah a, hlawkna tha tak chharchhuah a nih ngei a beisei thu a sawi a ni. Nakin zelah pawh market tha leh innghahna tlak a awm zel theih nan AYUSH lama thawktute leh stake holder hrang hrangte theihtawp chhuah tlang turin a sawm a. Minister chuan kuthnathawktute chawikan chu sawrkarin a ngaihpawimawh thu sawiin, Handholding Policy chuan medicinal plants farmer te pawh a la huam tel thuai a beisei thu a sawi a. Farmer te chu mahni thawhchhuah atang ngeiin hausak i tum ang u, tiin kalkhawmte a sawm a ni.

Vawiin Buyer-Seller-meet hawnna inkhawmah hian National Medicinal Plants Board, Ministry of AYUSH leh CSIR-North East Institute of Science & Technology, Jorhat, Assam aiawh lo kal te’n thu an sawi bawk a. Mizoram AYUSH chu India state zinga Integrated Component Project kalpui hmasa ber a nih thu te an sawi a. Mizoram leilung chu medicinal plants leh aromatic plants chinna atan a that thu leh, tam tham tak (a metric ton bi) a tharchhuak thei tan chuan hralhna lamah lungkham tur a awmloh thu te an sawi a ni. Inkhawm hi Dr. Lalkhawngngaihi Renthlei, CEO, SMPB chuan kaihruaiin, State Medicinal Plants Board chungchang sawifiahna a awm bawk a. Dr. S. Mara Thansiami, Deputy Director, AYUSH Directorate chuan lawmthu sawiin hun a khar a ni. H&FW Secretary Pi Sangchhin Chinzah pawh a tel a ni.

Ramhmul Damdawi leh Aromatic plants atanga thil siamchhuah hrang hrangte vawiin hian phochhuah a ni a. Chawhnu lamah Ministry of AYUSH leh CSIR-NEIST atanga mithiam lo kalte hnen atangin zirtirna neih chhunzawm a ni a. Hemi zawh hian kuthnathawktu (sellers) te leh a hlawm a an thil tharchhuah lei tur rawn zawng (buyers) te’n inkawmna hun an nei leh a ni.