941/2024-2025

Khawzawl 25th. June, 2024 : Mizo Zirlai Pawl (MZP) Headquarters, Khawzawl chuan vawiin chawhma dar 11:00 khan Khawzawl khawpui chhunga HSLC leh HSSLC Passed tharte lawmpuina leh a ti tha zual te chawimawina hun an hmang a, he hun hi Khawzawl Superintendent of Police (SP) Pu Lalchhuanthanga, MPS chuan khuallian niin a hmanpui a ni.

SP Pu Lalchhuanthanga chuan he hunah hian thu sawiin MZP in zirlai Passed thar te lawmpuina hun an buatsaih chu lawmawm a tih thu leh mipuite pawhin kan hlutpui thiam a pawimawh a ni a ti a. Zu leh damdawi rui nih hi mi tumahin kan duh loh laiin tunah hian heng thil vang hian Mizoram a rum mek a, nakinah chuan kan ram hi chhan theih loh leh chhantlak lohvin a awm ang tih a hlauhawm a, chuvangin vawiina zirlai kalkhawmte hian ruihtheih thil hrim hrim a tih a tih chhin loh tur a ni a ti.

SP chuan tun thlakhat chhung chhovah ringawt pawh Police ten ruihhlo an man hnem thu leh vawiinah pawh Zokhawtharah Secondhand Bale chhungah Heroin Hawng 330 lai an man tih a sawi a. Mizoram hi ruihhlo tawlhrukna kalkawng a nih avangin damdawi chi hrang hrang tamtak, a bik takin Heroin No.4 hi an rawn tawlh nasa hle a, Brown Sugar tak tak kan hmuh phak loh laiin tualchhunga hralh chhuah tur, Local Consumption pawh a hranin thianghlim lemlo takin an siam tawh a ni a ti a. Vawiina zirlai kalkhawmte chu ruihhlo that lohzia an thiante leh an unaute hrilhhre turin Ambassador ni nghal vek tura a duh thu sawiin zirlaite leh an unau te chu ruihhlo tihchhin tawh chuan a let theih tawh lohva, vawikhat tih chhinin vawihnih a hring a, Addict tawh te chu Jail-ah kumkhat chhung tangin, damdawi tih tur nei lovin awm reng mahse an rawn chhuah veleh an ti leh nghal tho zel a ni a ti a. Mizoramah hian mipa in ruihhlo kan ti nasa a, zu leh ruihhlo vanga kum naupang te a mipa thi kan tam avangin Census-ah hmeichhia aiin mipa kan hniam a, Electoral Roll a mipa kan tlem zawkna chhan pawh hei tho hi a ni tiin zu leh ruihhlo vanga mipa kan thih zel chuan kan nula te hian pasal tur an hmu zo lo ang tih a hlauhawm a ni a ti a. Ruihhlo a inchiuna avanga HIV kai kan ngah avangin HIV Positive hi Population a chhutin India ramah hian Mizoram kan sang ber a ni a ti a, ruihhlo tih hi Kristianna nen pawh a inrem lo lutuk a nih thu sawiin damdawi tih tawh chuan a nghawng chu Meidil a ni mai a ti bawk.

Vawiina zirlai pass tharte lawmpuina leh a ti tha zual chawimawina hun hi Pu R. Malsawmkima, Vice-President, MZP Hqrs. Khawzawl in kaihruaiin President Pu Rosangzuala pawhin zirlai naupang kalkhawmte fuihna thu a sawi ve bawk.