2936/2024-2025

Dated Serchhip, the 12th November, 2024: Vawiin khan Chief Minister Pu Lalduhoma chuan a bial Serchhipa Shalom Spastic Society te enkawl Rualbanlote school, Shalom Special School chu school bus thar Force Traveller (Mini Bus 21 seater) a pe.

School tuala bus hlanna a neih zawhah a lawmna inkhawm tawi New Serchhip YMA Hall-ah neihzui a ni a. Upa Vanlalchhunga, Chairman Shalom Spastic Society chuan kaihhruaiin, an school chanchin tlangpui sawina a nei a. Captain. Vanlaltharzuala chuan hunserh hmangin lirthei thar hlanna a nei.

Thusawiin Chief Minister chuan, sawrkarin rualbanlote zirna lama ngaihtuahna a sen mek thu a sawi a. Heng kan unaute tana insengso a, theihtawp chhuah thin mi tam tak kan nei hi Mizoram kan vanneihna a ni. Shalom Special School pawhin a school building thlenga saksaktu in nei hi a ropui a, 19 Assam Rifles te chungah lawmthu ka sawi a ni. Pathianin hmangaihtu tha tak tak a pe thin che u a, a pe zel ang che u tih pawh ka ring. Vawiina kan rawn hlan che u Bus thar pawh hi sawrkar sum engmah seng lovin, rualbanlote hmangaihtu, in mamawhzia hria, ka thianten an thawhkhawm atanga an lei a ni a. Kei hian a hming ka tum ve ringawt mai a ni, a ti. Bus thar nen ngei Chief Minister chenna tlawh leh turin a sawm nghal bawk.

He school hi kum 2005 a mi thahnemngaite din a ni a, an school building hi Assam Rifles ten kum 2011 khan an saksak a, eiin tur thilte an pe zui reng thin. Zirtirtu pathumten hlawh nei lovin zirtir hna an thawk mek a, zirlai naupang 32 an nei mek.