2937/2024-2025

Dated Serchhip, the 12^th November, 2024: State Disaster Management Authority (SDMA) kaihhruaina hnuaiah vawiin khan November ni 14-a Mizoram puma neih tur Mega Mock Drill atana inbuatsaihna Table Top Exercise neih a ni a. He hun hi Mizoram Legislative Assembly Conference Hall-ah neih niin District tin atangin District Disaster Management Authority (DDMA) te chu Video Conference kaltlangin an tel a. Serchhip District-ah pawh DC Pu Paul L.Khuma hovin  Serchhip DC Meeting Hall-ah he programme hi  mi pawimawhten an chhim a ni.

Video Conference neih zawh hnu hian Serchhip DDMA member te bakah he mock drill a tel tur department hotute leh a kaihhnawih mi pawimawh zawng zawng te chuan thutkhawm an nei chhunzawm nghal a. Serchhip District-a Mega Mock Drill neih dan tur chipchiar an rel a ni.

DC Pu Paul L.Khuma chuan chhiatrupna a lo thleng a nih pawhin inzirlawkna leh inbuatsaihna nasa tak kan kalpui chuan, a tak tak a lo thleng a nih pawhin kan buai lo anga, kan tih leh tih loh tur kan chiang dawn a ni, a ti a. Mock Drill hi nunchanzirna ni rih mah se, a tak tak anga kan hmachhawn a tul a ni, a ti.

November ni 14, 2024 zing dar 10 ah siren tihrik a ni dawn a. Serchhip Auditorium building a chim anga, Serchhip District Hospital Building thenkhat a chim anga, Hmar Vengah lei min nasa tak a thleng anga, Presbyterian English School a chim a nga, Tlangnuamah 11kv line a chhia a nga, Bilzelah ram kang a thleng dawn bawk a ni.

Chhanchhuahna hmanraw hrang hrang dahkhawma leh lakkhawmna hmun Staging Area atan Leisekawt Field hman a ni dawn a, Relief Camp atan Serchhip Indoor Stadium hman a ni bawk ang.

Vawiin hian team hrang hrang te leh department te mawhphurhna chipchiar taka sawiho a ni a. Mock drill-a thil thlen dan tur a chinchhuakin enlawk a ni.