India ram hmun kilkhawra tribal chhungkaw rethei leh harsa mipa leh hmeichhe naupang lehkha zir duhte tana Union Ministry of Tribal Affairs ina a bultum, Mizorama a pahnihna tur Eklavya Model Residential School (EMRS), Social Welfare Department enkawl tur chu vawiin khan Serchhip Kawlritlangah Chief Minister Pu Lal Thanhawla chuan a hawng.

Chief Minister chuan Mizorama a pahnihna tur Eklavya Residential School hawn theih a ni chu Mizoram tan hmasawnna rahbi thar a ni a ti a. Kum 2008 a Lungleia lo din tawh, Eklavya School hi kan tangkaipui hle a ni a ti a. Mizo ten thil tha kan duh , mahse a enkawlna lamah kan taima tawk thinlo a ni tiin, School thar hi a thar anga vawn fai reng a tul a, mitinin mawh kan phur a ni a ti. Chief Minister chuan School hian compound tha leh infiamna hmunhma a neih a tul tiin, Mizorama kan school tam zawkte hi chu commercial school te anih avangin duhthu a sam theilo a ni a ti.

Chief Minister chuan Eklavya tih chu Sanskrit tawng, mi tak tak a thua cheng thei tihna a kawk a ni a ti a. Chuvangin zirlai te hian hriatna zau tak nei tura chherchhuahna tur a ni a ti a. Keini tribal-te hi India Danpuiin kan nunphung leh ziarangte humhalh anih theihna turin dikna chanvo min siam sak a ni a ti a, hei hian khawvel eng min hmuh tir a ni a ti. Chief Minister chuan central atanga sum lokal te hi state sorkarin thuneihna a neilo tiin, sum min pekte a titawp emaw a khaihlak chang a awm emaw anih hian lo nawrh ngawt chi a nilo a ti a. Kan thlen chin atang zelin hmasawn kan tum tur a ni a ti.

School tan hma thu a sawiah, Chief Minister chuan school tan hma hi ram changkang te chuan tangkai thei ang bera hun hman an duh avangin zing takah school an tan a, India rama state tam tak pawhin hma takah an tan a ni a ti a. Tuna school tan hma kan kalpui hi kan enchhinna a ni a,kan hnam tan a thalo anih chuan a aia tha zawk kan dap mai tur a ni a ti. Zirtirtute chu inthlahdah lova, mar pata naupangte enkawlnaah tha thlah lo turin a chah bawk a ni.

Khualzahawm Social Welfare Minister Pu PC Lalthanliana pawhin thu sawiin Eklavya School building hrang hrangte chu chhuanawm a tih thu leh tha taka sa tu PWD leh Contractor te chungah lawmthu a sawi rualin; School building tha leh mawi tak chu an hlawhtlinna tehna anih dawn loh thu leh zirtirtute leh zirlai naupangte ah Eklavya School hlawhtlinna chu a lang zawk dawn a ni tih sawiin thahnemngai tak leh midangte entawn tlak a bul tan ta pawimawh thu a sawi a, School compound hungna tur leh infiamna tualzawl siamna tur pawh tunah hian Sawrkar Laipuiah dil leh mek anih thu a sawiin, Eklavya School a hlawhtlin theihna tura thahnemngai tak leh chak taka hma la tu Serchhip District Bawrhsap chungah lawmthu a sawi bawk.

Sports Minister Pu Zodintluanga pawhin thusawiin mirethei leh harsa zawk ten zirna tha leh school changtlung an belh ve theihna tura Chief Minister leh Social Welfare Minister hmalakna chu fakin Sawrkarin mipui leh ram tan tha leh zung sengin thil tha tam tak a tih sak mek lai a, a sawisel leh sawichhiat ringawt a ramtang thin kan awm chu pawi a tih thu a sawi a, a tha zawnga infuih tang sauh sauh zawk turin mipuite a ngen a ni. Pu Zodintluanga hian Eklavya School a hman tur TT Board, Volleyball, Net leh mamawh dangte a pek tur thu a sawi bawk.

Eklavya School-ah hian class XII thleng awm theihna tur Residential school, a thlawna awmna tur a ni a. Naupang pakhat enkawl nan kum khatah Rs. 42,000/- a ni a, hetah hian zirtirtu hlawh leh mamawh dang zawng zawng a tel a ni. EMRS din tur hian ram awl acre 15 – 20 a zau a mamawh a, building hrang hrang leh infiamna hmun zau tha a awm angai a ni. A dinna tur hian central sorkarin Rs.12 Crore atang Rs.16 Crore thleng state sorkar hnenah a pe thei a ni.

School hawn tak hi Ministry of Tribal Affairs in ni 12.7.2012 khan Mizoram sorkarah Rs.12 Crore a rawn sanction a, March 2013 khan a sak bul tan a ni. Tunah hian Middle School level thleng kalpui tan a ni a, school building naupang 150 len theihna tur class room 5 siam a ni a. Hemi bakah Administrative building, mipa leh hmeichhe hostel building, Staff quarters Type I unit 4, Type II unit 8 leh Type III unit 1 awm theihna te sak a ni. A building te hi April 2015 khan peihfel a ni a, electric 63 KVA transformer dah a ni bawk a, tui dahna tanky 40,000 litres len theihna 4 siam a ni bawk. Tunah hian zirlai naupang 50 chuang an awm mek a ni.

Inkhawm hi Pu K.Lalrinthanga, Parliamentary Secretary in a kaihruai a. Minister of State for Fisheries Dr. B.D. Chakma leh official engemaw zah an tel bawk a ni.