Ni hnih awh tur Mizoram Journalists’ Association (MJA) General Conference vawi 42-na chu vawiin khan I & PR Conference Hall Kolasib ah tan a ni a, a nikhatna programme, Session hmasa ber hi Environment & Forests Minister Pu Lalrinmawia Ralte in a hmanpui a ni.

Environment & Forest Minister Pu Lalrinmawia Ralte chuan MJA palai kalkhawmte chu duhsakna hlanin ziakmi a bik takin thuthar lakhawmtu leh thehdarhtute mawhphurna a sang a, an thuziah leh an ngaihdan te darhzaua mipui nawlpui rilru sutthlek leh an ngaihdan te a thlak theih avangin news source reng reng chu belhchian dawl a ni em tih te fianfiah a pawimawh a, hei hi entik lai pawhin an hnaah ngai pawimawh thin turin a chah a. Chanchinbu lam leh chanchinbua thuziah ‘journalism’ hi thiam bik nei te, a ti mi bik te tih chih anih vangin sumdawnna a ni lova, eizawnna a nih rualin, journalist-te hi thu dik tan tu leh phochhuak tu, awm lam nei lova hna thawk thin tu an nih angin kawng hrang hranga a nachang hre ber thinte an ni a, mipui te pawhin an lakah beiseinna an nei sang hle nia a hriat thu a sawi a. Mahni ina tih tur leh tih loh tur in bituk ‘self regulation’ hi social media ani emaw, chanchinbu lam ani emaw thil pawimawh leh tul nia a hriat thu sawiin hengah te hian a nachang hriatna hi thuthar thehdarhtute tan a pawimawh zual bik a ni, a ti.

Minister chuan media thil tih theihna hi a sangin, an thuziak te hi a darhzau a, media katlanga inzirtirna leh hriattur pawimawh te hi mipui lamah a thleng ranga, an bengkhawn zawk hle thin nia a hriat thu te sawi a. Look East Policy atana Mizoram leh Mizo thalaiten inbuatsaihna tha leh fumfe neih a tul zia chungchangte, sik leh sak intlak danglam ‘Climate Change’ chungchangte leh Mizoramin hemi lamah hma a lak dante leh chhiatrupna a thlen thulha inven chungchangte hi chanchinbu lamah lang tam thin se tia duh thu sawiin Minister chuan heng thu te hi chanchinbu kaltlanga mipuite hrilhhriat an nih chuan kan inbuatsaihna te hi a sawt hle dawn nia a hriat thu a sawi bawk.

MJA Conference hmanpuitu dang Kolasib DC Pu Jitender Yadav chuan mipui inrelbawlna democratic society ah media te pawimawhna sawiin media hian mipuite hnenah thu pawimawh a hriattir a, ngaihdan dik leh felfai nei turin a tanpui bakah media hian sawrkar hnathawk leh midang tena an hna theuh tha taka an thawh theih nan, a vengtu an ni thei bawk a ni, a ti.

MJA General Headquarters President Pu Vanlalrema Vantawl chuan a Presidential Address-ah journalist-te lakah mipui beiseinna a sang a, kan hriatzauna kan hna in a ken tel hi mahni zawn ah theuh inzira hma sawn I tum theuh ang tiin palai kalkhawnte chu a chah a ni.

He hunah hian Environment & Forests Minister Pu Lalrinmawia Ralte chuan MJA flag thar a tlangzarh a. MJA Gen. Hqrs. President Pu Vanlalrema Vantawl chuan ZOOM Kolasib in MJA General Conference puala Kolasib District hmun hma leh thil pawimawh te thlalak hmanga pholanna Photo Exhibition chu a hawng a ni.

Vawiin programme hi thuang thum a hman niin a thuang khatna hi Pu Zonunsanga Khiangte, Vice President, MJA Gen. Hqrs. chuan kaihruaiin Pu C . Lalhmachhuana, Secretary i/c Publicity, MJA Gen. Hqrs. chuan inhmelhriattirna a nei a. Pu H. Vanlalnghaka, President, Kolasib District MJA in palai lawmna hun hmangin Pu Lalremsiama, Secretary i/c Welfare MJA Gen. Hqrs. chuan kum kalta chhunga MJA member pathum boral tate – Laldinthara, LPS Vision, Aizawl; DK Sona, Lawngtlai leh Lalruatpuia Zadeng, JD Cable Lunglei te pualin sunna hun a hmang. Pu Lalsangzuala Hmar, General Secretary, MJA Gen. Hqrs. atangin kum kalta chhunga pawl hmalakna leh thil pawimawh dang tarlanna General Report leh Pu R. Lalhmangaihzuala, Treasurer, MJA Gen. Hqrs. atangin pawl sum dinhmun leh sum hmanna Financial Report te ngaihthlak a ni a. Session hi Pu Lal Rinmawia, Secretary i/c Organization, MJA Gen. Hqrs. lawmthu sawiin a khar a ni.

Thuang hnihna ah hian Mizoram Journalists’ Welfare Society thu ngaihtuah tur te sawiho a ni a, he Session ah hian Pu Jim K. Chozah, Director, I & PR leh Pi Lallianpuii, Deputy Director, I &PR te pawh an tel.

Thuang thuma ‘Rorel inkhawm’ hi Pu Vanlalrema Vantawl chuan kaihruaiin General Report leh Financial Report te sawizaunna neiin Report te hi pawm a ni a. Agenda engemawzat ngaituah leh sawiho tura chhawpchhuah te chu sawiho a ni bawk.

Naktuk khian MJA palai te hian Field Visit neiin hun an hmang dawn a. Bukvannei a Red Oil Palm Mill leh Vairengte a Counter Insurgency & Jungle Warfare School (CIJW) School te an tlawh dawn a ni.

MJA General Conference ah hian District hrang hrang atangin MJA Member 100 bawr vel an tel a ni.