Pu Lalrinmawia Ralte, Cooperation Minister chuan vawiin khan Mizoram State Cooperative Union Annual General Assembly, Vawi - 28na Vanapa Hall-a neih chu a hmanpui.

Pu Lalrinmawia chuan Cooperative Society in a tum ber chu mihring chawikan hi a ni a, mi pakhatin a tih theih loh hi tan rual chuan a tih theih zel a ni a ti. Tunlai khawvel Economy in nghahna chu hriatna a ni a, chuvang chuan hriatna dik kan neih a ngai a, hemi kawnga inhrilh hriatna tun ai hian neih uar a tul thu Minister chuan a sawi. Mizoram mipuite hian Cooperative Society in a tumte a hlawknate kan la hre chiang lo hle a mahse mi thahnemngai te zarah tunah hian Society 85 awmin member 50865 an awm chu lawmawm a tih thu sawiin, hei aia society leh member an awm tam zawk theih nana tan la turin MSCU hruaitute chu a chah.

Inkhawm hi Pu Lianthangpuia President MSCU Ltd. in a kaihruaia, Pu R. Vanmawia Addl RCS chu khual zahawm a ni. Kumin hi MSCU Ruby Jubilee(40) kum a ni. Chawhnu lamah rorel inkhawm neiin, Agenda hrang hrang chhawp chhuah te zingah ‘Ram puma Cooperative Society ten mumal leh chak zawka ke an pen theih nan leh Federation hrang hrang te hian Primary Society-a an member te hmalakpuina leh hmasawn nana an thawh theih nan MSCU hian Perspective Plan mumal siam ni rawh se’, ‘Cooperative Society ten Bank atanga Loan an lak zung zung theih nan Cooperation Department hi Guanrantor-ah tang thin se’ tih te chu sawiho a ni ang.