"Hna zawn chungchangah bukna pakhat hmanga buk kan nih tawh avangin mithiam filawr nih a ngai tawh a. Finna hi thiltih theihna a nih angin kan thatlai huna finna kan khawlkhawm a tul a, kan hmalam huna kan ram hmelhmang tur hi classroom-a kan duan avangin zirtirtute leh zirlaite pawhin thahnem kan ngaih zual a tul a ni" tiin Parliamentary Secretary leh Champhai North bialtu MLA ni bawk Pu TT Zothansanga chuan a sawi. He thu hi vawiina Champhai I&PR Auditorium-ah Champhai Town Area leh Champhai North huam chhunga HSLC leh HSSLC-a zirlai leh school tithate hnena lawmpuina a hlan naah a sawi a ni.

Pu TT Zothansanga chuan Champhaiin zirlai leh school titha chawimawi tur kan nei thei hi thil lawmawm tak a ni, a ti a. Champhai hi tun hmain mithiam chawr chhuahna a ni thin a, tunhnaiah tlahniam hret mah se zirlaite hian tih takzeta kan tih chuan zirnaah sang takah kan invawrh thei tih a chiang hle a ni, a ti. Zirlai kalkhawmte chu fuihin, zirtirtu tha tak tak kan nei a, zirna min puitu tur chak lak a awlsam tawh bawk a. Chutih mek lai chuan ennawm leh ngaihnawm khawvelin min run mek a, hengte hian kan zirna a tibalhhlah tur a ni lo a ti a.

Parliamentary Secretary chuan Champhai hi sumdawnna hmunpui ni tura buatsaih chhoh mek a ni a, hemi atan hian zirna lamah kan lo inbuatsaih ve a tul a ni, tiin MSU leh MZP-te chu zirna chawikanna atana huang khat atanga hma la turin a sawm nghal a ni Parliamentary Secy hian kumina HSLC exam-a 5-na Lalmuanpuia Khiangte, Springdale Academy leh Mizo Subject-a ti tha ber Vanl9alruati, King Solomon's School bakah HSSLC Vocational Course-a 1-na, Zosiampuii; 2-na Lalruatsangi; 5-na Lalmuanawmi; 8-na TBC Lalramengthianghlimi, Govt GM Higher Secondary School te hnenah lawmpuina thuziak leh tangka fai a hlan a. HSLC exam-a zirlai zaa za pass nei school 10: Bethel Mission School, Springdale Academy, Govt.Ruantlang High School, Govt. R.Hranga High School, Tlangsam High School, Pinehill Adventist Academy, King Solomon's School, Einstein Boarding School, Vapar New Secondary School leh Govt. Rabung High School-te hnenah lawmpuina thuziak a hlan bawk.

He hun hi Pu David Thangluaia, Chairman, NGO Coordination Committee, Champhai chuan a kaihruai a. Pu Lalnunsanga Fanai, Champhai Thalai pawl President chuan lawmthu sawiin hun hi a khar a ni.