Chief Minister chuan Mizoramah damlo inenkawlna duhthusama a la that tawk loh avangin inenkawlna tha zawk dawng turin mi tam tak state pawnah an kal thin a; Mizoram House chu an tlukluhna ber a nih thin avangin damlote te dawl zo zawk turin damlo tam takin an pan thin NEIGRIHMS, Shillong bula Patients' Lodge sa tura ruahmanna siam a nih tur thu sawiin, zin veivak dangte tan pawh a nawm zawk nan Mizoram House hrang hrangte chu a remchan ang zela thawm that leh sak that chu sawrkarin a ngaihpawimawh thu a sawi.
Patients' Lodge sak tur hi room 40 awm tura ruahman niin, a hmun hi feet 360 x 253 x 270 x 392 a zau a ni a. Enkawltute chenna tur leh tul dangte pawh a remchan dan anga sak belh zel tum a ni. Helai hmun hi March ni 20, 2014 khan Meghalaya sawrkar atangin luah phalna hmuh a ni. Chief Minister chuan a sak hna tan thuai a nih theih nan a hmalak tur pawimawh te tifel vat turin PWD thawktute a hrilh a ni.
Chief Minister hian Shillong Mizoram House ding mek, Cleve Colony a mikhual hmeichhia 30 leh mipa 30 lenna tur Dorm building sak mek pawh a enfiah a ni. Deputy Resident Commissioner Pu Mark Lalthanliana chuan a lo dawngsawng a ni.
CM Pu Zoramthanga hian vawiin chawhnu khan Guwahati a Mizoram House sak belhna tur hmun chu a tlawh bawk a. Helai hmun hi in rel dinglai niin, Chief Minister chuan damlo te hman tur tih rilru ah pu chunga an tana remchang thei tur bera sak chhunzawm ni se a ti a ni. In rel hi metre 26.95 x 14.45 bial a zau niin, chhawng 3 a ni a. Khawchhung Dan dinglai angin chhawng khat la sak belh leh theih a ni. Guwahati ah hian Chief Minister hi DRC Pu Donny Lalruatsanga leh thawktu dangten an ṭawiawm a ni.
Chief Minister hian nimin khan Silchar Mizoram House tlawhin, room thenkhat thawmthat ngai te a thlithlai bawk a ni.
Chief Minister hi September ni 9 hian Guwahati a NEC Plenary Meeting neih turah a tel dawn bawk a ni.
Attachment
- Loading attachment...
