Tukin khan Chief Minister Pu Lal Thanhawla chuan zankhat riak turin Siaha a tlawh a. Chawhnu khan New Siaha a Model Youth Association (MYA) Multipurpose Hall, Backward Regions Grant Fund (BRGF) sum hmanga sak chu a hawng a ni.

Hall thar hawnna programme buatsaihah thu sawiin Chief Minister Pu Lal Thanhawla chuan a bultumtu MYA ten vantlang leh thalai mamawh phuhru tur hmunhma siam nachang an hriat leh Hall sak anih theih nan theihtawp an chhuahna chu lawmawm a tih thu a sawi a. BRGF chu Sawrkar Laipuiin District hnufual bik te tan a ruahman a, kawng hrang hrang leh hmasawnna kawnga intluktlanna atana a buatsaih a ni a, Mizoramah chuan Siaha leh Lawngtlai District-te hian BRGF hi an hmang tangkaiin an chhawr hle a mahse hmun thenkhata Utilization Certificate leh Progress Report te a hun taka Sawrkar Laipui hnenah an thehluh loh avanga sum dawn tur kan dawng lo hi a vanduaithlakin a lungchhiat tlak thin a ni a. Chuvangin sum kan hmuh ang ang te hi dik taka hmang a, project a bahhlah loh nan lehkha kan thehluh turte hi a hun taka kan thawnthlak a pawimawh hle a ni, a ti.

He huna mipui, thalai leh zirlai pungkhawmte fuihin eng hna pawh thawk ila, Pathianin min hunna apiang hi a rawngbawl tura min dahna a ni tih hriat a pawimawh a, rinawmna, dikna, taimakna leh amah tihna nung nen a hming ti zahawm leh ti ropui turin ka chah duh che u ni, a ti a. Pathian kan lama a tan chuan policy ani emaw, programme a ni emaw, kan hnawhthawh ani emaw, a hlawhtling thin a, NLUP pawh hi Pathian lamtang programme anih vangin a hlawhtling a, Pathianin mal a sawm a ni, a ti.

NLUP chungchang sawi zauin Chief Minister chuan NLUP ah hian tunlai khawvel in a buaipui mek leh a vei em em sik leh sa inthlak danglam nasa siam that te, tuihna kang chat siam that te leh boruak chhe mek siam that te a fuan kim vek a hemi avang hian UNO pawhin tha tiin Sawrkarin a sawm ni miah thawhho turin Aizawlah pisa hawngin hna an thawk tan a ni, a ti.

NLUP ah hlawhtling te tanpui turin leh vanduaina avanga hlawhtling lote chhawmdawl nan NLUP hi New Economic Development Programme-in a chhunzawm dawn a, hma lak mek anih thu sawiin NEDP hnuaiah Chief Minister's Rural Housing Programme bultanna turin Siaha leh Serchhip District te thlan an nih hmasak thu sawiin hemi kaltlangin mirethei in leh lo nei lote tan insakna tur tanpuina pek an ni dawn a, ti a.

Thalai te tan khawvel thar buatsaihna kawnga infiamna ruhrel siam chhoh mek a ni a, Siaha leh Lawngtlai ah chuan duh anga hmun rem te hmuh mai anih loh vangin Sawrkarin duh angin hma a la thei lova chuti chungin a hmun kan hmuh tawhah te hian chak taka hma lak tumin theihtawp chhuah mek a ni, a ti. Chhim lamah leihnuai hausakna zawnna kawng hna tan anih theih nan Sawrkarin theihtawp chhuahin company te kan nawr nasa a, hna an tan vat kan beisei a ni, a ti.

Mipuiin Sawrkar hna thawk tha leh hruaitu tha an mamawh angin sawrkar tha leh hruaitu tha mipuiin an mamawh a, that leh that in kan inlawm tawn tur a ni, a ti. Inpumkhatna chungchang sawiin Duhlian tawng kan zavaia kan hre thei hi Pathian in kan hnam thuikhawmtu leh kan inunaua kan inkungkaihna atan min pek a ni tih ka ring a, YMA, MTP leh YLA ten hmanni lawka Joint Cultural Meet hlawhtling taka an buatsaih kha a ropui a, ram leilung fate hian ram neitu nihna kawngah leh ram leh hnam siamna kawngah mawhphurhna inchen kan nei vek a, hei hi hre renga kan inpumkhatna ti chak zawnga hma kan lak theuh a ngai, a ni, a ti.

Kaladan Multi Modal Project chungchang sawiin he ruahmanna ah hian a neitu bik te in ni a, chuvangin hemi atan abikin thalai leh mipui te inbuatsaih leh kan inzirtir a tul a ni, a ti bawk.

Hall hawnna inkhawm hi DRDA Siaha Project Director Pu V.L Hruaizela'n kaihruaiin Hall sak dan chungchanga technical report a pe bawk a. Rev. Thylua Hlychho in Pathian hunserh a hmang a. Mara Autonomous District Council (MADC) Chief Executive Member (CEM) Pu R.T. Zachono pawhin thu a sawi a.

He programme ah hian MADC EM leh MDC te bakah Ex-Minister Pu S.Hiato pawh a tel a ni. Vawiina MYA Multipurpose Hall hawng tak hi kum 2004 khan a bultan niin a tirah BADP sum hman niin 2009 atangin BRGF sum hmanga sak choh a ni a, a sak nan hian cheng nuai 80 sen a ni.

Hall hi a zau zawng square metre 500 a ni a, Hall hnuaia Basement I hi square metre 421.25 a zau niin TT Hall, MYA office leh car parking te a awm a, Basement II hi square metre 183.90 zau a ni

Attachment

  • Loading attachment...