Nimin (28.11.2016) khan Saitual Group YMA leh Saitual Zone Football Association tangkawp in a buatsaih Saitual Inter Branch YMA Football Tournament kharna inkhawm chu Home Minister Pu R.Lalzirliana, bialtu MLA ni bawk chuan a hmanpui.

Khuallian chuan thu sawiin, thalaiten hriselna leh sport lama hmasawnna an neih theih nan a, saitual group yma in football tournament a buatsaih chu lawmawm a ti a. Infiamna hmanga thalaite tana intihhlimna buatsaih chuan thalai tamtak ruitheih thil lak ata chhanchhuakin nun beidawng mai tur tamtak chu nun kawng dika a hruai thin thu a sawi a. Infiammite, thalaite leh khawtlang hruaitu kalkhawm te chu fuihin mahni nun in vawng uluk turin a chah.

Minister chuan mizoram chu India rama Hiv+ve vei tam ber dawttu a nih chu pawi a ti thu a sawi a. mizorama Aids darh tamna chhan ber chu SEX a nih thu sawiin hei hi rilru nat thlak tiin kristianna nen a inhmeh loh thu a sawi bawk.

Thalaite leh nupui pasal nei tawh te pawh nun uluka mahni kawppui te laka rinawm turin a chah a. Hiv+ve leh ruihtheih thil avanga nuna harsatna tawk mek te chu thinhrik mai loa hmangaihna leh hriatthiamna nena enkawl turin a chah bawk. Chutih laiin Aids veite pawh damdawi tha tak a ei chuan rei tak an dam thei thu sawiin, engkim tithei Pathian belh tlat a pawimawh thu a sawi bawk. Kristianna nena inzawmna neilo halpuah chu Sawrkar leh cyma tangkawpin kuminah an khap leh tur thu a sawi a, Mizoram a Branch YMA zawng zawng leh mizoram mipuite chu he hmalakna hi thlawp turin a sawm bawk.

Bialtu MLA chuan he football tournament hi a sponsor a, centenary field, khiangpui zau laih mek chu MLA fund atangin cheng nuai 3 in tanpuina a hlan bawk a ni.

He kharna inkhawm hi CYMA Finance Secy. Pu Lalrochuanga pawhin a hmanpui a. Thu sawiin branch zawng zawng (branch-18) tel theihna football tournament buatsaih a nih chu lawmawm tiin, thalai tamtak chu nunkawng dika a kaihhruai a beisei thu a sawi. Ram a tluk chhiat loh nan, ruihhlo dona kawngah branch yma te tan tlan a pawimawh thu a sawi a, YMA chu moral support chauh ni lovin physical support pawh pe tel turin mipuite a ngen a ni.

Kharna inkhawm hi Pu Ramchhuanmawia, President Saitual Group YMA in a kaihruaia, Pu C Lalkima,Vice President Saitual Group YMA chuan lawmthu sawina in a khar a ni.

He tournament ah hian saitual group a branch yma awm zawng zawng Branch-18 in an khel a, final ah Bazar Veng Branch leh Venglai Branch inkhel in 5-2 in Venglai Branch YMA an champion a ni. Champion hian Dekchi tin 10 dawng an dawng a, runner up in dekchi tin 7 dawng an dawng bawk a ni.