Vawiin khan Aizawl North-III bialtu MLA Pu Lal Thanzara, I&PR Minister chuan a bial chhung, Electric Venga Theihai Tuikhur a hawng.

Pu Lal Thanzara chuan MP Pu CL Ruala’n Theihai Tuikhur pawimawhna hriaa, a fund atanga a chei thatna tur sum a pe chu lawmawm a ti a, a nihna tur dik taka sum an hman avang leh tuikhur hmunhma mawi leh chhuanawm taka an chei that avangin Electric Veng Local Council leh khawtlang hruaitute chungah lawmawm a sawi a ni. Mizoram chhunga tuihnate a kang chah loh nan a humhalh hna YMA leh sawrkarin an thawk mek a. Theihai lui pawhin kang chat lova hna tha tak a neih zel theih nan a chheh vel thing leh mau humhalh te, a thianghlim nana vawnhim kawngah te, a chhawrtu mipuiten mawh an phur a ni, Minister chuan a ti.

Theihai Tuikhur hi thal lai pawh a kang ngai lo, Aizawl veng pali -Electric Veng, Ramthar Veng, Armed Veng leh Chhinga Venga cheng ten an chhawr tangkai a ni a. A chei that hna hi August ni 1, 2016 khan thawk tanin ni 90 chhunga thawh zawh a ni. Lok Sabha MP Pu CL Ruala’n MP LAD Fund atangin cheng nuai 12 a pek hmanga chei that a ni.

Attachment

  • Loading attachment...