Ni 4 zin chhuaka Hrangturzo bial mipuite hnena lawmthu hrilh a khaw hrang hrang a fankual naah nimin khan Chief Minister Pu Lal Thanhawla chuan Sialsir a tlawh a, a khaw mipuite hian amah lo lawmin, an khaw Community Hall-ah ropui takin vantlang inkhawm an neihpui a ni.

Chief Minister Pu Lal Thanhawla chuan Mizoram history-a khaw pawimawh leh ropui Sialsir a tlawh thei chu lawmawm tiin bial mipuiin  hneh taka an thlan tling vangin lawmthu a hrilh a, amaherawh chu party ruahmanna leh thutlukna anga bial a chhuahsan tur chu pawi a ti a, party thu awih thin mi anih angin party remruatna chu hreh tak chunga a pawm a ngai a ni, a ti.

Pu Lal Thanhawla chuan zalenna chungchang sawiin thisen chhuah leh tharum thawh lova, Pathian duh dan leh Ama remruatna in engtikni ah emawni chuan  tuna ram pathum a awm mek Zofate chu insuihkhawm in, rorelna pakhat hnuaiah an awm lovang tih a sawi thei loh a ni, a ti. Kawng tin renga intodelhna chuan zawhawmna leh ropuina te a ken tel thu sawiin Sawrkarin intodelhna atana ruahmanna hrang hrang a kalpui mekte chu mitinin neitu rilru pu a, a mawhphurtu theuh kan ni tih hria a, midang te tana malsawmna kan nih theuh theih nan kan zavaia kan tanruala, hma kan lak a tul a ni, a ti bawk.

Chief Minister chuan Mizote chu Pathianin a zawnchhuah hnam kan ni a, khawvel a Chanchin Tha hril turin Mizo hnam hi a thlang a, chanchin tha hril a A duhdan anga kan awm chuan chimrala kan awm hi a phal lovang tih ka ring tlat a ni a ti a. Lei hnuai hausakna chu Pathianin a hnam thlan te tana an hnam zahawmna leh ropuina atan a dah sak ngei a rin thu sawiin Chief Minister chuan lei hnuai hausakna, a bikin gas chu ngawrh taka a zawnchhuahna hna company ten an thawk mek a, Meidum leh Keifang ah te chuan gas a awm tih finfiah ngei a ni tawh a, gas zawnchhuah hna Mizoram chhim lamah Reliance Company hnena pek chu hma an lak har avangin tunhnai khan Sawrkar Laipui chuan an licence an cancel sak a, a thawktu midang zawn mek a nih thu a sawi bawk.

He hunah hian amah tawiawmtu - Horticulture Minister Pu P.C.  Lalthanliana, Health Minister Pu Lal Thanzara, Law Commission Chairman Pu John Siamkunga leh NLUP Implementing Board Vice Chairman, Pu P.L. Thanga te pawhin thu an sawi a ni.

NLUP Implementing Board Vice Chairman Pu P. L. Thanga chuan NLUP Village Level Implementing Committee leh Monitoring Committee a hrang ve ve a awm thin chu Committee pakhat – NLUP Village Level Committee ti a kalpuiturinhma lak mek a nih thu a sawi. Khaw hrang hranga NLUP lama an hmalakna pakhat Jhum Control lamah inelnasiamtum a nih thu a sawi bawk.