LAD, Social Welfare & Horticulture changtu Parliamentary Secretary Pu K. Lalrinthanga chuan vawiin khan a bial chhung khaw hrang hrang N. Chhimluang, Phainuam, Saihapui V leh Vairengte te tlawhin kawng tinrenga ram leh mipuite hmasawnna thlentir turin theihtawp a chhuah dawn tih a sawi.

Heng a bial chhung khaw hrang hrangah te hian mipuiten ropui takin anlo hmuak a. Thuchah sawiin Pu K. Rinthanga chuan, Mizoram ti hmasawn tur hian mipui leh keini mipui aiawha thlanchhuahte hi nasa taka kan tan tlan a ngai a. Thurawn pek a tul hunah min pe hreh lo ula, he kan ram zimte hi ram nuam leh ram intodelha siam turin ke kan pen tlang dawn a ni, a ti a. Tuna kan thlen chin atang hian phawkhai rual takin ke i pen za ang u, a ti a ni. A bial mipuite chu amahah leh tun sawrkar thara rinna nghata tun dinhmuna hlangkaitu an nih avangin lawmthu a hrilh a, khawtlang mamawh chi hrang hrang a mit ngeia a hmuhte leh khawtlang hruaituten a hnena anlo thlente ti hlawhtling tura theihtawp a chhuah dawn thu a sawi a ni.

Pu K. Lalrinthanga hi a nupui Pi Thangchhungi’n a tawiawm a. Nimin lam leh nimin piah lam khan Thingthelh, N. Hlimen, Saipum, Saiphai, N. Chawnpui leh Bilkhawthlir khua te a tlawh a. Naktukah Vairengte, Phaisen, Bukvannei, Buhchangphai, Saihapui K, N. Thinglian, Rengtekawn leh New Builum khua te tlawh kual lehin a bial chhung khuate hi a tlawh chhuak vek dawn a ni.