3227/2022-2023

Aizawl, 12th January, 2023: Chief Minister Pu Zoramthanga leh Aizawl East-I bialtu ni bawk chuan vawiin khan Sihphir VC House leh Rohrenga Hall chu khuallian niin a hawng.

Chief Minister chuan khawtlang inrelbawlna atana tangkai tak tur VC House changtlung tak leh vantlang punkhawmna atana hmun remchang tha tak hall tha tak vawiinah Sihphir ah hawn a ni thei chu lawmawm a ti a. A hlawhtlinna tura khawtlang hruaitute hmalakna leh anmahni tawiawmtute chungah lawmthu a sawi a ni. Hall hming atana Sihphir lal hlui Rohrenga hming vuah a ni chuan mi hmasa mi ropui te chawimawina rilru an pu tih a lantir in, a fakawm hle a ni, a ti a. Vawiina VC House leh Rohrenga Hall hawn tak chu tangkai taka hman a nih ngei a duhsak thu a sawi. Chief Minister chuan pipute thlangtlaa Mizoram an rawn luh dan te, Kristianna ramchhunga a luh dan te, kum sawmhnih chhung ram buai paltlang hnuah remna hlawhtling tak Mizoramin a la neih zel dan te a sawi a. Pathian remruat ang zelin thil a thlen dan leh, tunah chuan remna leh muanna siam a chanchin tha puandarh hi kan mawh ve a nih thu a sawi a. Kan dinhmun theuh atangin theihtawp chhuahin rawngbawl hna thawkin, ram malsawmna haichhuah theih a nih thu a sawi.

Vawiina Sihphir VC House hawn tak hi LAD atanga sakna tur sum cheng nuai 10 hmuh hmanga bultan a ni a, hall hi khawtlang bazar hmun ding sa chunga sak ni thungin, bank loan la a sak a ni. Rohrenga Hall hi feet 54x36 a zau a ni.

Hall hawnna programme hi Sihphir VC Vice President Pu Lalnelawma chuan kaihruaiin, Pu Lalropuia Pachuau VCP chuan lawmna thu sawiin report a pe a. DLAO Pi Lalhruaitluangi Pu Rohrenga fanu Pi Lalnghinglovi leh Sihphir Br. YMA President te hnen atangin thusawi ngaihthlak a ni bawk a.