3152/2022-2023
Aizawl, 28.12.2022: Chief Minister Pu Zoramthanga chuan vawiin khan Sihphir Venghlun GSA Futsal Ground a artificial turf hawnna leh a lawmna tournament buatsaih hawnna a hmanpui.

Chief Minister chuan Sihphir Venghlun GSA futsal ground chu tangkai taka an hman a, tournament hlawtling tak an neih ngei a duhsak thu a sawi a. He inkhelhna hmun tipuitling tura MLA fund atanga concrete zut leh phul lem phah bakah mi thehnemngaite hmalakna kaltlanga hmalakna hrang hrang lo awm tawhte chu tha a tih thu leh, cheibawl hna thawh hmabak la awm chu a tul anga a bawhzui zel a nih tur thu a sawi a ni.

Chief Minister chuan hmasawnna ruhrel hrang hrang din a sawrkarin hma a lo lak thu leh, thawh mek leh hmabak la awm chungchangte sawiin, ram hmasawnna atan theihtawp sawrkarin a chhuah zel tur thu a sawi a. Chung zingah chuan Durtlang Leitan leh Sihphir inkar kawng zauh a tel thu sawiin, hemi atana sawrkar laipui atanga sum sanction hmuh ah compensation component a tel loh thu a sawi a. Mizoram hmun thenkhatah compensation beisei avang emaw, beisei tam lutuk avang emaw a hmasawnna hnathawh a lo thuanawp phah tawh dan sawiin, kan zavaia that tlanna tur a ni tih hriaa rilru zau tak pu in, ram siam rem ngai chungchang lo enzuitu tur committee te pawh a tul anga din tha a tih thu a sawi bawk. Chief Minister chuan Sihphir pum chu hmun remchang, hmasawnna ruhrel din belh zelna tura atan pawh a hmunhma nei tha a nih avangin zirna lam a ni emaw, infiamna lam a ni emaw, healthcare emaw, hmasawnna in a ken tel hmasawnna ruhrel din belh theih remchang leh hmalak dan turte ngaihtuah a rilru seng tura a duhsak thu a sawi bawk.

Adviser to CM Pu C. Lalramzauva pawhin he hunah hian thu sawiin, a lawmpui thu a sawi a. Duhsak taka ground buatsaih sak chu tangkai taka an hman ngei a rin thu leh a beisei thu a sawi. Sihphir chu Aizawl mipui thlai hnah leh thlai rah a chawmtu pawimawh tak, khaw intodelh tak an ni tiin, kuthnathawh lama an entawntlak thu a sawi a. Pu C. Lalramzauva chuan kan ram kal chho zel dan tur a thalaite mawhphurhna sang tak an neih thu sawi bawkin, chumi atan chuan hriselna tha neih a pawimawh thu a sawi a. Hriselna tha neih theih nan taksa insawizawi nachang hriat a tul thu leh, chutianga tangkai tur sports hmunhma sawrkarin tihmasawn a ngai pawimawh chu lawmawm a ti a ni.

Vawiina Futsal Ground hawn tak hi kum 2018 atang khan a hmunhma buatsaih a ni a. PCC flooring turin bialtu MLA Local Area Development fund hmuh cheng nuai thum dawn chu hman a ni a. Chumi hnu ah MLA fund atang bawkin cheng nuai li hmuh leh a ni a, artificial turf phah nan hman a ni.

Futsal Tournament hi Sihphur Venghlun, Sihphir leh Nausel huapin Under -13 leh puitling team engemawzat an tel dawn a ni.