3151/2022-2023
Dated Serchhip, the 28th December, 2022: Nimin ni 27.12.2022 khan Er.Lalrinawma, Minister, Social Welfare & Tribal Affairs, etc., chuan MSU Darlawng Branch ten Darlawng Community Hall -a zirlai titha lawmpuina hun leh an pawl dincham kum thumna an lawmna chu khuallian niin a hmanpui.

Er. Lalrinawma chuan, zirlai tihtha chawimawi tlak thahnem tak Darlawng khawtlangin an nei leh MSU ten chawimawina hun buatsaih nachang an hria chu lawmawm a tih thu a sawi a. Chawimawina dawngtute chu tuna an result leh chawimawina an dawnah duhtawk mai lo tur leh an kal zelna tura chonaah ngai zawk turin a chah a ni. Zirlai kal khawmte chu mahni tumah chianga tun atanga lo inbuatsaih nachang hre tura ngenin, rinawmna, chhelna leh tih takzetna nena mahni zirlai theuh an zir chuan hlawhtlinna an chang ngei dawn tih a hrilh a ni. Nun kawng dik lo, zu, drugs leh ruihtheihthil dang leh mipat hmeichhiatna lakah pawh fihlim a pawimawh thute leh nu leh pa thuawih a pawimawhziate a hrilh a. Vawiina zirlaite hi nakin lawka kan ram hruaitu turte leh kan ram innghahna tur an nih thute sawiin engkimah Pathian rawn chunga kal thin turin a chah a ni. Zirlai tithate chawimawina hun buatsaihtu MSU te chu fakin, Darlawng khawtlang nu leh pa, VC leh NGO's tanrualna chu entawntlak a tih thu a sawi a. Tuikum bial leh Mizoramin hma a sawn zel theih nana thawhpuiah a sawm a ni.

He hunah hian Uaptu, Pu Lalrampanmawia, Fin. Secretary MSU General Headquarters leh Khualtha Pu C.Zonunsanga VCP Darlawng te pawhin thusawina hun an hmang a ni.

He hun hi Francis H. Lallungmuana, President, MSU, Darlawng Branch-in kaihruaiin Pu Haunghinglova'n hun serh a hmang a, VC, MUP, MHIP leh YMA aiawhte atangin thusawi hrang hrang nghaih thlak a ni bawk.