Vawiin khan Chief Minister Pu Zoramthanga chuan Sihphir Venghlun High School kum 25 tlin lawmna Silver Jubilee hmanpuiin, zirlaite hnenah tumruhna leh taimakna, nu leh pate thuawihna leh mahni inthununna nen chuan hlawhtlinna a neih theih thu te, Pathian duh anga hnathawh leh ruihtheihthil laka fihlim a tul zia sawiin Sihphir Venghlun High School chu "tumruhna nen din a ni a, tumruhna nen a bak pawh chhunzawm zel ang u" tiin zirlaite a sawm a ni.

Chief Minister chuan Sihphir Venghlun High School chu Mizoram school dang thenkhat te angin nu leh pa, khawtlang hruaitute thahnemngaihna hrinchhuah, khawtlang inrawnkhawmna atanga din a ni chu lawmawm a tih thu leh tun dinhmuna zirna tha taka kalpui a, pass percentage pawh chhuanawm tak a nei chho zel chu fakawm a ti a. A dintu hmasa ten an mimal sum te hmanga, thawhkhawm leh inhlawhna nen hma an lo lakna chuan Zoram mipui thahnemngaihzia a tarlang a ni, a ti a. Chief Minister chuan mipui sum lakluh a tam chuan education tha nei turin chhungkaw tinin sum tam zawk an sen theih tur thu sawiin, SEDP kaltlangin chutiang tak chuan kumtina chhungkaw sum lakluh tihpun tum a ni, a ti a. Chumi tur chuan mitin in an theihna zawn theuhvah leh an hnathawhnaah thahnemngai taka taima taka hma an lak erawh a ngai a ni, a ti.

Vawiin programme ah hian kumin HSLC 2019 exam a zirlai tithate hnenah lawmpuina hlan nghal a ni bawk a. Sihphir Venghlun High School atang hian zirlai 34 in hlawhtlinna changin an pass percentage chu 94.44% a ni.

Sihphir Venghlun High School hi kum 1994 khan din niin, kumin academic session atan hian zirlai 103 (Class-IX ah 52, Class-X ah 51) an nei. Kum 2008 khan Adhoc status pek an ni. Vawiin an Silver Jubilee lawmnaah hian Former Deputy Speaker Pu R. Lalrinawma leh bialtu DEO leh a thawhpui thenkhat ten an telpui a ni.