Chief Minister Pu Lal Thanhawla chuan vawiin khan Bawngkawn Brigade Area-ah Comprehensive Spastic Children Care Complex sakna tur lungphum a phum. He Complex hi Health & Family Welfare Department kaltlanga NEC atanga sum hmuh hmanga sak a ni a, Spastic Society of Mizoram in a enkawl Gilead Special School hmun tur a ni.

Chief Minister chuan Spastic Society of Mizoram chuan rawngbawlna fakawm tak an thawh thu leh, zau zawka rawngbawlna an neih theihna tur hmun tha tak an nei tur chu a lawmpui thu a sawi a. SSOM member-te inpekna leh teireipeihna te, harsatna tam tak tawk chunga an beidawng ngailo chu chhuanawm a tih thu sawiin, Pathian a innghah chuan engkim a tih theih tilangtu an ni, a ti. Chief Minister chuan rualbanlo te hmakhua chu sawrkar pawhin ngaihtuahin, an puala sawrkar hna siam leh kawng dang dangah te hma lak sak thin a nih thu a sawi a. Zirtirtu qualification tha an neih loh avanga harsatna tawk an awm thin chu pawi a tih thu leh, chung harsatnate chu sutkian a nih theih nan sawrkar lama hmalak a nih tur thu Chief Minister hian a sawi a ni.

Spastic Children Care Complex sakna project man chu Rs. 774.17 lakhs a ni a, kum hnih chhunga sak tura ruahman niin March 2020 a sak zawh beisei a ni. He Complex hian ram 2941.63 metre bial a zau ah sak niin, a vaiin Building unit pathum - Administrative Building (516.67 Sqm), Hostel Building (548.43 Sqm) leh School cum Assembly Hall Building (1429.81 Sqm) bakah 406.72 Sqm a zau Playground leh Tui Tanky 40 Sqm a lian awm tura ruahman a ni. Brilliant Consultancy, Chaltlang Dawrkawn chu he Complex sak hna hi an thawk a ni.

Vawiina Comprehensive Spastic Children Care Complex lungphum phumnaa khuallian Chief Minister hi Pi Lal Riliani, President, Indian Society on Tobacco & Health, Mizoram Chapter President chuan tawiawmin, Commissioner for Persons with Disabilities leh Health Department leh Department dang atangin official thenkhat an tel bawk a ni.

Spastic Society of Mizoram hi kum 1989 a din tan niin rilru lama rualbanlo naupang tanpui hna an thawk thin a, Gilead Special School hi 1990 khan mimal In luaha din tan in, hmun hrang hranga an awm hnu in tuna Brigade Area ah hian anmahni hmun tur an nei ta a ni.