Vawiin khan Kamalanagar-a CADC Art & Culture Hall-ah Chakma Autonomous District Council (CADC) Chief Executive Member (CEM) 12-na atan Pu Shanti Jiban Chakma chu Lawngtlai Bawrhsap Pu N. Chakhai MCS chuan rinawmna thu tiamtira la lutin, BJP kaihhruai United Legislature Party (ULP) sawrkar thar chu din a ni.

Pu Shanti Jiban Chakma hi kumin April ni 20-a 10th CADC inthlanpui neih zawh takah khan 3-Chhotapansury MDC bial atangin BJP ticket-a thlan tlin a ni a. He inthlanah hian bial 19 atangin MNF-in seat 8, INC-in seat 6 leh BJP-in seat 5 an la a. Party mala sawrkarna siam thei an awm loh avangin BJP leh INC MDC-te chuan thawh hona pawl ULP dinin, an hruaitu atan Pu Shanti Jiban Chakma hi an thlang a. Governor remtihnain sawrkar thar hi lak luh a ni ta a ni. CEM lak luh hma vawiin chawhma lam khan MDC thar 19 te chu rinawmna thu tiamtira lak luh hmasak an ni bawk.

Pu Shanti Jiban Chakma chuan CEM anga a thu sawi hmasak berah BJP-in inthlana an thutiam chu bawhzui vek a nih tur thu a sawi a. Group A & B hna lak reng reng pawh duhsak bik leh inthliar hranna awm lovin dan ang taka dik taka kalpui a ni ang, a ti a. Hemi nem ngheh nan hian independent recruitment board pawh din nghal a ni ang, a ti bawk.

CEM thar chuan zirna, inkal pawhna kawng leh hlemhletna nuai bo te chu an ngaih pawimawh tur a nih thu a sawi a. BJP atangin Hiranand Tongchangya, Sanjeev Chakma, Anil Kanti Chakma leh Kusum Lota Chakma te; INC atangin Bubon Kumar Chakma, Onish Moy Chakma leh Mohan Chakma te chu Executive Committee-a tel tur an nih thu a puang nghal.