Vawiin tlai khan Disaster Management & Rehabilitation (DM&R) Minister Pu C. Ngunlianchunga chuan DM&R Conference Hall-ah chhiat tawh leh thil tul danga hman tur Search & Rescue hmanrua: Drone Phantom-4 Advance leh Remote Area Lighting System (RALS) with remote control district hrang hranga Emergency Operation Centre (EOC) aiawhte hnenah a sem.

DM&R Minister chuan DM&R Departmentin an mamawh em em tihhlawhtlin nana ruahmannasiama ni chu lawmawm a tih thu a sawi a. Heng hmanruate hi chhiatna hrang hrang thlen huna chhanchhuah hna thawhna atan an tangkai em em dawn a ni tiin hetiang huna hmanrua hmang tu turte hi an pawimawh hle bawk a ni, a ti a. Hmanruate chu uluk taka enkawl a ngaih thu sawiin hmanna tur dik taka hmang turin a chah a. Neitu thinlung pu chunga enkawl turin a fuih a. DM&R hnathawkte chu chhiatrupna thlen hun pawha rang taka chhawmdawlna pek a nih theih nana tan la tura chahin chhiatna thlenna hmunah thleng hmasa pawl an ni ngei tur a ni, a ti bawk.

Drone Phantom-4 Advance hi chhiatna thlenna hmuna chunglam atanga chiang taka thlalak theihna a ni a, chhiatna tuar tute zawn hmuhna kawnga puitu tangkai tak tur niin chhiatna in a huam chin hriat nan a tangkai hle bawk. Drone hian camera 20 megapixel-a thla la theiin, video pawh 4k resolution in a record thei a, vanlamah km 4-5 thleng thlawk kangin thla a la thei bawk a ni. Remote Area Lighting System (RALS) with remote control hi eng awm lohna hmun leh hmun kal harsaa chhiat tawh thut a awm huna hman tur niin LED Life span 50000-100000h leh Lumens 10000-12000 LM bakah beam angle a awm a. Awlsam taka fit leh theih mai, kenkual awlsam tak a ni.

Program hi DM&R Joint Secretary Pu K. Lalhmingliana chuan a kaihruai a. Technical report ngaihthlak niin DM&R Director Pu H. Dolianbuaia chuan lawmthu sawina in hun a khar a. Heng bungrua bakah hian chhanchhuahna atana hman tur Search & Rescue bungrua chi hrang hrang DEOC pariatah leh SDRF unit 7-ah pekchhuah an lo ni tawh bawk a ni.