St. Paul’s Higher Secondary School chuan vawiin khan kumina HSLC leh HSSLC Exam naah an school naupang Top Ten-a tlingte leh subject mala mark hmu sangte chawimawina programme “Paulians’ Proficieny Award 2018" chu Paulians’ Alumni Association nen tangkawpin a buatsaih a. Chief Minister Pu Lal Thanhawla chuan he hun hi khuallian niin a hmanpui.

Chief Minister chuan HSLC leh HSSLC Exam-a zirlai titha te chu a lawmpui thu sawiin, an nu leh pate inpekna, an zirtirtute thawhrimna leh anmahni mimal taimakna te a ni, a ti a. St. Paul's Higher Secondary School in kum tam tak chhung topper an nei chho thei zel leh pass percentage tha tak an nei thin chu a lawmpui thu a sawi. Zirlaite chu khua leh tui tha, ram innghahna an nih theih nan an zirna lama theihtawp chhuah bakah an nun an uluk a, nu leh pa leh zirtirtute thuawih nachang hre turin leh, aia upa zahna Zo zemawi chu vawng reng turin a chah a ni. Chief Minister chuan zirlaiten hmathlir tha an neih a, chumi atana inpuahchahna tha an neih theih nan sawrkarin kawng hrang hranga hma a lak dan te a tarlang a. Zirna quality tha zawk Mizoramin a neih theih nan Education Reforms Commission din a nih thu te, Civil Service leh Army Recruitment a Mizo tling an tlem tak avangin chumi kawnga ngawrh zawka hma la leh tura Mizoram Youth Commission kaltlanga Coaching class buatsaih a nih thu te, sawrkar hna mai piah lama hna tha leh hlawk tak tak thawk thei tura thalaite puahchah nan Skill Development zirtirna pek a nih thu leh NEDP hnuaia Entrepreneurship Development Scheme kalpui a nih thu te, Sports lama tui miten dinhmun sang zawk an thlen theih nana sports infrastructure tihchangtlun zel a nih thu leh, tunah pawh rah tha a chhuah tawh thute a sawi a. Zirlaite chu heng hmasawnna ruangam thalaite tana buatsaih chu hmang tangkai turin a sawm a. Zirlaite chu khawi hmunah pawh awmin khawi hmunah pawh hna thawk thei tura huaisenna leh taimakna leh rinawmna vawng tura chahin Chief Minister chuan English mai bakah Hindi tawng thiam tum tel turin a chah bawk. CM Pu Lal Thanhawla chuan SPHSS in result a nei tha hle thin a, zirlai tha tak tak chhuakin hna pawimawh tak tak chelhtu te annih chhunzawm thu te sawiin, Mizoram hming pawh he school hian a tih tha thin a ni, a ti a. Zirlai tithate chu an kal zelna turah hlawhtlinna an hmuh chhoh zel a duhsak thu a sawi bawk.

Kumin HSLC Exam-ah St.Paul's HSS hian 1-na, 2-na, 4-na, 6-na leh 8-na te an hauh a; Mathematics-ah leh Science ah mark sang ber nihna hauh in, Maths ah mark 100 leh Science ah mark 99 an hmu a ni. HSLC Exam-ah zirlai naupang 370 neiin an zavaiin an pass vek a, chung zingah chuan 157 chu Distinction-ah, 198  I Division-ah, 15 chu II Division-ah an passed a ni. Pi Lal Riliani, President, Indian Society on Tobacco and Health: Mizoram Chapter chuan HSLC topper te hnenah hian lawmpuina hi a hlan a ni.

HSSLC Science Stream-ah, 1-na (zirlai naupang pahnih), 2-na, 3-na, 4-na, 5-na, 7-na leh 8-na hauhin, Commerce Stream-a 2-na an hauh bawk a. St. Paul’s zirlai naupang te hian Computer Science, Physics, Biology, Business Studies leh Accountancy subject-ah te mark hmu sang ber nihna an hauh bawk a ni.

HSSLC Science Stream-ah zirlai naupang 186 an neih zingah 42 chuan Distinction-ah, 127 in I Division-ah leh 15 in II Division-ah an passed a. HSSLC Commerce Stream-ah zirlai naupang 40 an neih te zingah 4 chu Distinction-ah, 17 in I Division-ah, 15 in II Division-ah leh 2 III Division ah te an passed a ni.