Vawiin khan Cultural Heritage Center, Lungleiah Mizoram chhimlama a hmasa ber atan Mizoram Youth Commission Chairman, Pu Joseph Lalhimpuia’n MYC-SSC Coaching Center a hawng. Hawnna inkhawm ah hian a kaihhnawih sawrkar department official-te, MJA member-te, MZP Headquarters Lunglei hruaitute leh MYC-SSC Coaching Center-a zirlai inziaklut te an tel.

MYC Chairman Pu Joseph Lalhimpuia chuan zirlaite chu chhungkua, khawtlang leh ram tana chhawr tlak ni tura theihtawp chhuah tura fuihin ram leh hnam tana mi pawimawh, nakin lawka kan ram leh khawtlang hruaitu tur an ni tih hre thar leh turin a chah a. SSC Exam kaltlang hian Govt. of India hnuaiah hna thawh tur tam tak a awm a, kan ram hmasawn zelna turin heng hna te hi Mizo thalai tam zawk ten an luah ve a tul a ni, a ti. MYC hmalaknate sawilangin NEET leh IIT-JEE exam inpuahchahna atan India rama Coaching Centre hlun berte zinga mi ALS Delhi kaltlangin Lungleiah Online Coaching Centre MYC-in a hawng tawh a, ALS Delhi kaltlang bawk hian hun reilote ah UPSC Coaching pawh hawn tum a ni, a ti a. Mizo thalai tam zawk ten Commonwealth ram hrang hrangah eizawnna an hmuh theihna turin IELTS Coaching pawh kalpui mek a nih thu sawiin Mizoram Youth Commission chu British Council hnuaia International English Language Testing System (IELTS) Examination Centre atan inremna neih a ni a; hei hi North East India-ah IELTS Examination Centre pangngai hmasa ber a ni dawn, Pu Joseph Lalhimpuia chuan a ti. MYC leh ALS Delhi-in thawhhona thuthlung an ziah chunchang sawiin Corporate Social Responsibility (CSR) hmangin ALS hian zirlai 100 an rawn sponsor tur thu a sawi a. 

MYC chuan "Thalaite khawvel zauh ang aw" tih auhla nen Mizoram thalaite hmasawn nan theihtawp a chhuah zel dawn a, he an hmalakna ti hlawhtling tur hian NGO leh Kohhran te tanho puiah MYC Chairman hian a sawm a ni. MYC hnuaia SSC Coaching atana inziaklut tawhte chu Pu Joseph Lalhimpuia chuan theihtawp chhuah tura fuihin an district atana bul tantu an nih in hriaa mi dangte tana entawntlak khawpa taimaa zir tur leh  SSC  kaltlanga hna hmu ngei turin a duhsakna a hlan bawk a ni.

He hunah hian Lunglei DC Dr Ankita Chkaravarty, IAS pawhin thu sawiin MYC-SSC Coaching Center Lungleiah hawn a ni chu thalaite tan thu lawmawm leh chhinchhiah tlak tak a ni tiin Mizoram Youth Commission leh Southern Mizoram Zone Coaching Centre Committee te chungah lawmthu a sawi a. UPSC exam hmachhawn tura an inpuahchah dan tlangpui sawilangin Lunglei DC chuan taimakna leh tumruhna tel lo chuan heng competitive exam ah hian a hlawhtlin theihloh a ni, a ti a. Zirlaite chu mahni inrintawkna nei tura chahin class-a an hriatthiam loh te inthlahrung hauh lova an zirtirtute hnena zawt thin turin a chah a. Coaching Center hlawhtlinna chu zirlaite ah a innghat thui hle a ni tiin zirlaite chu class kal loh mai mai ching lo turin Lunglei DC hian a chah bawk.

 Vawiin hawnna inkhawm hi Prof. J. Zorema, Principal, Government J Buana College, Lunglei-in a kaihruai a. SSC Coaching Class Lunglei khawpuiah  hawn ani chu Mizoram chhimlam mipuite, a bik takin thalaite tan malsawmna ropui tak a ni tiin he Centre din tura thahnemngai taka hma la tu MYC Chairman Pu Joseph Lalhimpuia chungah lawmthu a sawi a. India rama competitive exam sang berte zinga mi SSC exam hmachhawn tura inpauchahna Centre tha tak kan nei ta chu hmasawnna rahbi pawimawh tak a ni tiin zirlaite chu taima tak leh tum tak takna rilru nen inpuahchah turin a fuih a ni.

He hunah hian Pu Vanlalchhanchuaha, Course Coordinator, MYC-in report pein Pi C. Lalremruati, MIS, IPRO Lunglei-in competitive exam atana a inpuahchah dan sawina hun a hmang bawk. Pu Lalmuanzuala, Secretary, South Mizoram Zone Coaching Center Committee-in lawmthu sawiin hun a khar.

MYC-SSC Coaching Center, Lungleiah hian tun dinhmunah zirlai 80 chuang an inziaklut tawh a, MYC hian an Course Fee 75% a tum sak dawn a ni. Class-hi SSA Recreation Center, Venglaiah neih tur niin vawiin tlai atang hian heng zirlaite hian class an kal tan nghal ang.