Kum 1999 a sak tan Falkawn-a State Referral Hospital chu vawiin khan Chief Minister Pu Lal Thanhawla'n a hawng.

Chief Minister Pu Lal Thanhawla chuan mipui te chhawr tangkai theih tura State Referral Hospital hawn a lo ni ta chu lawmawm a tih thu a sawi a. Ram leh hnamin hma a sawn dawn chuan a chhunga cheng te hian pek tur kan nei ve tih sawiin State Referral Hospital sak a nih theih nan a thlawna ram pe tu Falkawn mipui te chungah lawmthu a sawi a ni. Chief Minister chuan ram hmasawnna tur nghakhlel taka kan thlir laia tute emaw sum leh pai it vanga Project kal lai tam tak a thuanawp thin chu a lungchhiat thlak hle a ni, a ti a. Compensation buai avangin ram hmasawnna hna a kal chak hleitheilo chu pawi a tih takzet thu sawiin Pu Lal Thanhawla chuan ram chhiat leh thatah ram leilung faten mawh kan phur tih hre thar leh turin mipui te a chah a ni. Hnam zahawm ni tur chuan intodelh a tul a, intodelh tur chuan taimak a ngai a, taima tur pawhin hrisel that a ngai tiin Chief Minister chuan zuk leh hmuam, ei leh inah Mizoram mipui te fimkhur turin a chah nawn leh a. Taima taka mahni mawhphurhna theuh hlen turin leh midangte tana malsawmna nih tum turin kalkhawm te a fuih a ni.

Health Minister Pu Lalrinliana Sailo pawhin State Referral Hospital hawn a lo ni ta chu Mizoram tan ni chhinchhiahtlak a tling a ni tiin hawn a nih theihna tura thahnemngai taka tan la tu te zawng zawng chungah lawmthu a sawi a. Health Department a thawktute chu an thawhrimna ropui tiin hmasawn vaklo ni awma an lan lai pawhin sorkar laipuia mithiam ten tehna chi hrang hranga an tehnaah tling an ti a, report hrang hrangah pakhatna dinhmun an hauh ta fo chu lawmawm a tih thu Minister chuan a sawi a ni.

Health Director Dr. Lalrinliana Sailo chuan State Referral Hospital din anih dan report tlangpui a sawi a. He report-a a lan dan chuan 1996 a Prime Minister HD Deve Gowda Mizoram tlawha a lo zin tum khan State Referral Hospital dinna turin Mizoram sorkar hnenah cheng vaibelchhe 40 pek a tiam a. Hemi bawhzui hian Mizoram PWD chuan cheng vaibelchhe 40.53 DPR a siam a. February ni 15, 1999 khan DONER chuan a thawhkhatna atan cheng vaibelchhe 5 pe chhuakin building hi sak tan a ni ta a. DONER hian a thawh lina thleng fund pechhuakin 11 .9. 2001 thleng khan cheng vaibelchhe 25 a release a ni. Thil man sang chho zel avang leh chhan hrang hrang avangin revise DPR siam a ni a, DONER Ministry ah thehluh niin December ni 4, 2002 NLCPR meeting vawi 18 na chuan a hnawl a, khum 300 ruahmanna awmsa chu tih hniam a rel ta zawk a ni. Hemi kum vek hian DONER chuan khum 50 awmna tur Hospital tan na turin cheng nuai 166 a release ta a. Health Department in hma la in Administrative Building-ah khum 50 dahin Hospital chu tan a ni a. Hospital main building atan, a chhawng hnuai ber (ground floor) chin chu khum 170 awmna tura ruahmanin sum pekchhuah bang chu Ministry of DONER chuan a rawn release tan leh ta a ni. Sum release chhung hi installment 7 niin Mizoram sorkarin a do let nan kum 2008 khan cheng nuai 51 a release ve leha, December ni 12, 2010 ah PWD chuan DONER Ministry ah completion certificate a thehlut ta a ni. Health Minister thahnemngaihna in Hospital thuam thatna tur hian cheng vaibelchhe 18 hmuh theihna tur DPR chu sorkar laipuiah thehluh leh mek a ni bawk. He hospital a thawk tur post 137 siam tur hian chak taka hmalak a ni a, tunah hian cabinet remtihna nghah mek a ni. A thawhkhatna atan Aizawl Civil Hospital atangin Surgery, Dental, Medicine, Paedeatric leh Gynaecology OPD te chu sawn a ni a. Staff te chenna turin kum 2011 leh 2012 chhungin quarters unit 92 chei that a ni bawk a ni.

State Referral Hospital hawnna inkhawm hi Health Department changtu Parliamentary Secretary Pu S Laldingliana'n a kaihruai a. Minister Pu Nihar Kanti Chakma, Deputy Speaker Pu John Rotluangliana, Parliamentary Secretary Pu Lal Thanzara, Pu H Zothangliana, Pu KS Thanga, Deputy Chief Whip Pu RL Pianmawia, Lunglei HPC Vice Chairman Pu Joseph Lalhimpuia, Law Commission Chairman Pu R Lalrinawma, KVI Board Chairman Pu K Lianzuala leh MLA Col. ZS Zuala te pawh hawnna inkhawmah hian an tel a. Health Secretary Pi Esther Lal Ruatkimi'n lawmthu sawiin hun hnung a khar a ni.