Pi Niharika Rai, IAS, Kolasib DC chuan, ‘Mipuiin mi hlemhle leh eirute ualau taka kan dem a kan hnualsuat hun hunah kan khawtlang hian hmel thar a hmu ang’, a ti.

International Anti Corruption Day 2012 hmanna vawiina Kolasib DC Conference Hall-a neihah he thu hi Pi Rai chuan a sawi a. Corruption hi mitinin kan duh loh leh kan do rawn ni mahse a tirem tur erawh chuan thinlung taka kan do a tul a ni, a ti a. Central Scheme tehian Mizoram min huap ve vek a. Chuti chung chuan engvanga Development hi chak lo si nge a nih tih hi kan ngaihtuah lo niin a lang a. Development awmzia tak tak hi chhut ngun ila. Kan ram leh khawtlang hmasawn nana sum awm te a taka dik taka hman a nih theih nan mipui tehian tan i la ang u, Pi Rai chuan a ti. Mipui thinlungah Corruption dona tak tak hi awm nise chu Sawrkarin ram a lak chungchangah Land pass lem leh dik lo a awm nia sawi tepawh sawisel hun hawn a nih laia tuman an sawi lote kha thil mak tak a ni, Pi Niharika Rai chuan a ti a ni. Corruption hi thil thar a nil ova. Mihring min tichhe thei, mite rinkai lova min siamtu a nih avangin uar lehzuala kan do a tul takzet a ni, a ti a ni.

International Anti Corruption Day hmanna hi Pu Zairemmawia, Addl. DC in a kaihruai a. Pu Madhur Verma, IPS, SP, Kolasib chuan thu sawiin Khawvel ram hrang hrang 175 te Corruption tehna –a chhutah India ram chu 94 na kan ni mek a. Hmasawnna tur thui tak kan nei a ni, a ti a.Tun dinhmunah RTI te a lo awm tak hnu hian thui tak hma kan sawn thei a ni, a ti a. Mipui leh sawrkar mite Corruption do tur hian kan tan tlan a tul a ni, a ti a ni.

Sawrkar Deptt. head aiawhin Dr. Saihlira, DVO chuan thu a sawi a. Pu HT Rila, Pre, Sub Hqrs YMA ,Pu Lalchhandama, Chairman, Jt. VC leh Pu H. Zohmingthanga, Pre, PRISM ten thu an sawi bawk. Pu Lalrinzuala, SDC chuan report a pe bawk a ni.

He ni puala Essay Competition, Debate –a tithate leh Chanchinbu article/editorial ziak tha ber Duhlai hnenah lawman hlan a ni bawk a ni.