Vawiin khan Chief Minister Pu Lal Thanhawla chuan State Tax Zonal Office Building, Deputy Commissioner of State Tax Zone-I leh Zone-II thuthmun tur chu New Secretariat Complex, Khatla ah a hawng. Building thar hawnna inkhawmah hian Taxation Minister Pu Lalsawta chu khualzahawm niin, Agriculture, Irrigation & Water Resources, etc changtu Minister Pu KS Thanga pawh a tel a ni.
 
Chief Minister chuan tun kum sawm chhung hian nasa takin sawrkar department-te tichangtlung tura hmasawnna ruhrel hmuh tur a awm a, heng hmalaknate ti hlawhtling tura tha thawhtute chungah pawh lawmthu ka sawi a ni, a ti a.  Taxation Department chu Mizoram ang state te ah chuan revenue lukluhna pawimawh tak an nih thu sawi a. Thawktute pawhin thahnemngai taka thawk zawm zel turin leh, an dawrtu mipuite te pawh tha taka dawngsawng zel thin turin a chah a ni. CM Pu Lal Thanhawla chuan sawrkar chu langtlang leh mipuite tana dawr nuam, a thawktute pawh mi rintlak leh belhchian dawl an nih a ngai a, chumi atan chuan post sang ber atanga hniam ber thlengin thawktute an pawimawh a ni, a ti a. State hmasawnna tura hmalakna kalpui mek NLUP avanga beneficiary-te thawh that avang te leh sawrkar lama thawktute thawhrimna avangin economy-ah pawh Mizoramin hma sawn chho zelin, India rama state GSDP thang chak ber pakli zingah Mizoram a tel thu te, Per Capita Income ah national average aia Mizoram a sang thu te, chaw khawpkhamlo awm tlemna ber state a thlan anih thu te, state te 12 zinga “Best Governend State” a uan anih thu te sawi telin Chief Minister chuan heng hlawhtlinnate hi a NITI Aayog te, World Bank leh organization dang ten an zirchianna atanga siam a nih thu sawiin, hmasawn zel turin tangrual taka kan thawhho a pawimawh bawk a ni, a ti
 
Khualzahawm Minister Pu Lalsawta chuan Taxation Department chu mi in luaha bultanin vawiin building changtlung tak an nei ta chu a lawmpui thu a sawi a. Ramin  hma a sawn chuan chhiah a pung a, chhiah a pun chuan sawrkarin mipui tan tha zawkin hna a thawk thei zel bawk a ni, a ti a. Department thawktute taima leh rinawm taka thawk zui zel turin a chah bawk a ni.
 
Minister Pu KS Thanga pawhin thu sawiin, Taxation Department chu Mizoram sum dinhmun atan an pawimawh em avangin thawktuten rinawm taka an thawh zui zel a duh thu leh, building tha tak an neih chu a lawmpuina thu a sawi bawk.
 
Vawiin building thar hawnna inkhawm hi State Tax Auditorium-ah hman niin, Pu Vanlalchhuanga, Commissioner & Secretary, Taxation Department chuan a kaihruai a. Pu lalthangliana Varte, kum 2009-2015 chhunga Commissioner of Taxes lo ni tawh chuan thu sawi bawkin, programme hi Pu L.H. Rosanga, Commissioner of State Taxes chuan lawmthu sawiin a khar a ni.
 
Vawiina State Tax Building thar hawn tak hi NEDP kaltlanga cheng nuai 443.14 hmanga sak a ni a, Commissioner of State Tax chu Nodal Agency a niin UD&PA ten engineering service tumin, F.K. Construction ten a sak hna tak hi an thawk a. Nikum 2017 September thla khan thawh tan niin, August ni 30, 2018 khan sak zawh a ni. A vaiin chhawng 5 a awm a. Ground Floor leh First Floor hi Taxation Department Zone-I leh Zone-II awmna tura ruahman niin Deputy Commissioner, Asst. Commissioner of Taxes, Inspector of Taxes leh staff-te awmna tura ruahman ve ve a ni a. Second Floor ah Auditorium leh mi 50 lenna Conference Hall awmin, Basement-I chu Canteen leh Parking Area atan duan a ni a, Basement-II ah Chowkidar Quarter pahnih a awm a ni.
 
Taxation Department hian tun sawrkar kum atana chhiah an khawm zat tur an ‘target’ chu cheng nuai 37,400 niin, thla nga chhungin an target atanga 64% an hmu tawh a ni.

Attachment

  • Loading attachment...