Nimin tlai khan tlangram  hmasawnna ngelnghet atana tihtur leh hmalakna kalpui dan tur chungchanga inrawnkhawm vawi 6-na, Sustainable Mountain Development Summit VI(SMDS VI), Mizoram University, Tanhril a nghah chu Mizoram Chief MInister Pu Lal Thanhawla'n a hawng a. SMDS VI hian nithum chhung a awh dawn a; he hunah hian India ram hmun hrang hrang leh ram pawnlam palai 300 rual velin tlangrama hmasawnna ngelnghet neih theih dan zirhonna bakah an thil zir, tawn, hriat leh  hriat inkawhhmuh tawnna hun ang hmang dawn a ni.

SMDS hawngtu, Chief Minister Pu Lal Thanhawla chuan hmasawn mek leh thang lai, tlangram state te tana pawimawh tak, zirchianna te bakah sawihonna hun leh hmun Mizoramah nghah a ni chu lawmawm a tih thu a sawi a. Thiamna, inthlunzawmna leh intlawhpawh tawnna kawng hrang hrangah khawvel a than chak viau laiin mi zawng zawngin pawimawh kan tih tlan vek pakhat a awm a; chu chu 'hmasawna ngelnghet, hmalam hun a tana him si' chu  a ni a ti a.  "Hmasawnna turin tan kan la vek a, hmasawn kan duh vek a; mahse, hmasawn kan duhluata thang leh thar hman tur awm lek lova kan leilung hauhsakna kan tih chereu vek si chuan thil pawi liantak kan khawih tihna a ni  ang", a ti.

Chief Minister chuan hmarchhak tlangram te chu leilung leh a chhunga awm, a chunglang a to leh chawr, ramhmul, hnimhnah chitinrengte bakah chung thil kara cheng thilnung chitin reng tam bikna hmun, bio-geographical zone ah pawh Indian, Indo-China leh Indo-Malayan Bio-geographic region a ni tih a sawi a. Chutiang lam hawi, rilru a dah chunga SMDS VI chu kalpui ni se a duh thu a sawi a ni. Tlangram a hmasawnna ngelnghet neih a nih theih nan chona tamtak hmachhawn leh hneh ngai a awm tih a sawi a. "Hmarchhak bial, fur a ruahtui tam em em thal a tui van em emna ni si te hi engtin nge kan hlawkna turin  kan siam ang. Kan inah te bakah kan huanah te pawh senso tlem zawkin engtin nge ruahtui kan khawl ang tih te hi mithiam ten chhanna hmu se ka duh a. Tlangram a khawpui thang chho mek ten khuarel chhiatna lian tak tak kan tawh mawlh mawlh te hi ven dan emaw pumpelh dan kawng dap ni se. Ruahmanna fel tak duan ni se a lawmawm khawp ang. Kan ramngaw chereu chak lutuk leh kan lui, tui hna kang chat mek siam that dan te pawh dap tel ni se", tiin SMDS VI palai te chu an summit hlawk taka hmang tura fuihin duhsakna a hlan a ni.

SMDS VI hawnna inkhawmah hian khawmpui thlengtu, Mizoram Sustainable Development Foundation(MSDF) aiawh in  MSDF President Dr. Lalbiakmawia Ngente, Covener, SMDS VI ni bawkin palai te lawmna leh summit chhunga hun hman dan tur a sawi a. Hemi hnu hian Pu Alemtemshi Jamir, President, Integrated Mountain Initiative(IMI), Pu PD Rai, Lok Sabha MP, Prof. Lianzela, Vice Chancellor, MZU leh Pu Ramesh Negi, Councillor-elect, IMI ten  thupui nei hrang vekin thusawina hun an hmang a. Hemi hnu hian Chief Minister Pu Lal Thanhawla'n SMDS VI puala thlak pholan te khuhhawnna a nei a ni.