India ram puma thingtlang khuaa cheng zawng zawng ten ekin tha leh thianghlim an neih vek theihna tura hmalakna pakhat, Total Sanitation Campaign kalpui mek tichaktu atan, ni 2 October atanga ni 4 November thleng awh tur, India ram puma an lo hman tan tawh, Sanitation Festival ‘Swachchata Utsav’ PHE Department buatsaih chu vawiin khan Vanapa Hall-ah Chief Minister Pu Lal Thanhawla chuan a hmanpui.

Chief Minister chuan kan duh ber chu Total Sanitation Campaign(TSC) tih hlawhtlin hi a ni a ti a, nakum atanga hman tan tur, 12th Five Year Plan ah pawh la chhunzawm zel tur anih thu a sawi a. TSC hian peng hrang hrang pali pawimawh tak tak a ken tel thu sawiin, chhung tinin inthiarna tha neihte, school sanitation leh hygiene te, khawtlang tana inthiarna hmunpui siam leh aganwadi inthiarna leh liquid waste management te an ni, a ti a. Central sorkar in TSC a rawn duanchhuahna chhan pawimawh tak chu midang hmuh theiha, ualau taka rel kawng sir angah te inthiar hmuh tur an tam thin vang anih thu sawiin, Chief Minister chuan hmanlai Mizo te inthiarna chu dai anih avangin, kan pipu te khan kawm thlangah zung la, kawmchhakah inthiar rawh an ti thin a ni, a ti a. Hei hi kawm thlang lam atanga rimchhia thliin a rawn tleh chhoh loh nana ti an ni, a ti. India ram pumah inthiarna tha ekin nei, sanitation coverage chu chhungkhat ang zela chhutin, kum 2001 khan 21.9% anih laiin kum 2011 ah chuan 73% ani chho thei a ni,a ti.

Chief Minister chuan inthiarna lama fai leh thianghlimna ah, Mizo te hi kan la sanglo hle nia a hriat thu sawiin, mikhual kan neih thin te hian airport atanga Aizawl an rawn panna lamah kopanga lo zung ta mai mai leh ti keng kunga hmeichhe hmuh tur an awm thin hi an tawnhriat leh hmuh hmasakte an nih thin avangin Mizote hi khawlo deuhin min hmu mai ang tih te a hlauhawm a ni a ti a.Chuvangin heng laiah te hian vantlang inthiarna siam dan a awm thei ang em tia sorkarin ngaituahna a hman thin thu a sawi a. Mizote hi kan la tlem avangin faina leh thianghlimna lamah hmalak a harsat a rin loh thu sawi bawkin, kan zavaia lungrual taka kan tan tlan chuan state dangte entawn tlak khawpin kan faiin kan thianghlim thei a ni a ti.

Khualzahawm Pu H.Zothangliana, Parliamentary Secretary pawhin thu sawiin, Mizo te hi faina leh thianghlimana kawngah hma kan sawn hle nia a hriat thu a sawi a. Thangthar ten zuk leh hmuam that lohna te hriain inhnamhnawih duh lohna rilru an rawn nei chho zel te thil lawmawm tak a ani a ti a. Hmasawnna a awm chhoh hian thil thalo a rawn chhuak ve zel thin a, Faina a hmasawnna ah hi chuan chutiang thil thalo, negative thil a keng tel ve ngailo a ni a ti.

Inkhawm kaihruaitu Dr.Dilraj Kaur, IAS, Special Secretary, PHED chuan Central sorkarin mitin hriselna tha nei tura a duh avangin thingtlang khaw tin leh zirna in tinin ekin tha pangngai an neih ngei theihna tura hmalakna, Total Sanitation Campaign ruahman anih thu sawiin, chumi tichak tura he sanitation festival hi buatsaih a ni a ti. Centralah chuan October ni 2 khan hman tan anih tawh thu sawilang bawkin, Mizoramah chuan vawiin hian tan ve a ni a ti a. November thla ni 4 thleng khian he kutpui hi hman a ni ang tiin, a inkarah programme eng eng emaw siam chhoh zel a ni ang a ti.

Inkhawmah hian Pu RL Pianmawia, Govt Dy Chief Whip leh AMC Chairman Pu C.T. Zakhuma te pawh an tel a. PHED official te leh Chaltlang HSS leh Mount Carmel HSS naupangte an tel bawk a. School naupangte hian Chanmari atanga Vanapa Hall thleng Sanitation Rally an rawn nei bawk a ni.