Vawiin khan Kolasib DC Pi Niharika Rai, IAS hovin DC Conference Hall- ah Department hotu ten mipui te tana Sawrkar chanchin hrilh hriat dan tur leh lungawilohna an neihte ngaihthlak dan tur District Information & Grievances Redressal System chungchang an sawi ho.

Meeting-ah hian August thla tawpa Chief Minister hova District tinte DC ko khawma lo rel tawh sawrkar langtlang leh felfai a awm theih nana mipui ten Department tin te hna thawh dan leh an scheme kalpui te puanzar a nih theih nana District Information & Grievances Redressal District DC kaihhruaina hnuaia siam tura tih chu a taka kalpui nghal tura tih a ni a. Pi Niharika Rai chuan hemi chungchang hi sawifiahin khaw tina miten sawrkar hnathawh dan an hmuh theih nan Deptt. tin kalphung leh biak pawh theihna chuang lehkhabu siam a nih hunah lehkhabu chu VC te hnenah sem chhuah a ni dawn a ni, a ti a. Mipui te tana ban phaka thil chhawp chhuah hi Deptt. tinten kan tum tur a ni tiin chu chuan kan hnathawhna kawngah pawh thui tak min pui dawn a ni,a ti. Socio Economic Census neih turah in tina luta an kal huna AIDS chungchang zirtirna mitin chhiar theiha sem a nih theih nan Department hotu kalkhawm te chu Paper A4 size Ream 1 thawh turin a sawm bawk a ni.

District Information & Grievances System kalpui turah hian Kolasib District chhunga Department theuhte chanchin leh thawktute biakpawh theihna tur telephone no.tarlanna lehkhabu siam thuai a ni dawn a. Mipuiin thil hriat thiam loh leh lungawilohna an neihte chu uluk taka enin chungte chu DC hova thukhawma thlir ho a ni ang a, thla khata Nilaini hmasa ber chu hemi atan hian ruat nghal a ni.