Sorkar tha, mipuite banphak leh mawhphur ngam, e-Governance kan neih theihna tura Central sorkar National e-Governance Plan zulzuia buatsaih, State Wide Area Network (SWAN) chu vawiin khan Chief Minister Pu Lal Thanhawla chuan Information Communication Technology office-ah a hawng.

SWAN hawnna inkhawm Assembly Annexe conference room a buatsaihah, Chief Minister chuan Mizoram chu India a SWAN nei state 28 te zinga a tel ve ta chu a lawmawm hle a ni a ti a. Khawvel ram thang chak takah Information Technology hmang hian sorkar tha leh langtlang, mipuite banphak leh eirukna laka fihlim a din theih a ni a ti a. Mizoram chu hmun kilkhawr a awm anih vang hian IT hi duh angin kal chakpui a harsa a ni a ti a. Inbiakpawhna,telecommunication min petu ber BSNL service hi Mizoramah chuan duhthu a sam pha lo hle a, tan an lak a ngai hle a ni a ti.

Chief Minister chuan technology tha zawk optical fibre cable angte hi hman tangkai anih loha, ngaihthah a awm chuan SWAN hian awmzia a neilo mai ang tih a hlauhawm a ni a ti a. Chuvangin inkalpawhna tha kan mamawh ang bawkin inbiakpawhna, telecommunication tha, rintlak leh khaihlak awm lova internet connectivity kan neihna turin BSNL hotuten tan an lak thar hle a ngai a ni a ti a.India sorkarin thingtlang kilkhawr ber thlenga inbiakpawhna tha thlunzawm hi a thil tum pawimawhte zinga mi anih thu sawilangin, Mizoram ang, mihring maktaduai 1 awrh chauh chennaah thil harsa tak anih a rinawm loh a ni a ti.

Chief Minister chuan Taxation department in e-Tax Governance an hman leh Home Department in CCTNS (Criminal and Crime Tracking Network System) an hmang chu a lawmpui thu a sawi a. Mizoram SWAN chu Mizoram mipuite hamthatna tura hawngin, thingtlang mite tan Aizawl leh khawpui dang dang a tih hnaih phah sak ngei a beisei thu a sawi bawk a ni.

Khualzahawm Information Communication Technology Minister Pu Zodintluanga chuan SWAN hian Mizoram chu hmasawnna rahbi pawimawh takah a hlangkai a ni a ti a. Inbiakpawhna lamah Mizoram hi a hnufual avangin, hmasawnna nei turin nasa taka hmalak anih thu a sawi a. Powergrid Corporation of India puihnate ngen a nih thu leh Universal Service Obligation Fund (USOF) atangte a tanpuina sum dil a nih thu a sawi bawk.

Dr.S.S.Garbyal, Principal Secretary, ICT Department-in kalkhawmte lawmna thu a sawiah, SWAN chu E-Governance ruhrel 3 te zinga ban pakhat pawimawh tak a ni a ti a. SWAN din tur hian central sorkarin phalna leh senso tur Rs.20.59 Crore ni 29.3 2007 ah a rawn pek thu sawiin,kum 2009 - 2010 ah bul tan chauh a ni a ti a. Implementing Agency ah ZENICS ruatin, WIPRO Ltd. chu consultant ah hman a ni a ti a. Network Operator atan Vyamtech, New Delhi chu ruat ni bawkin, KPMG chu a viltu leh endiktu ah ruat a ni bawk a ni a ti. SWAN bakah hian State Data Centre leh Citizen Service Centre te chu ruhrel pawimawh dangte anih thu a sawi bawk.

Mizoramah CSC hi hmun 136 (thingtlang)ah siam a ni tawh a, heng hmun atang hian a duh apiangin tribal certificate te, income certificate, birth certificate te leh a dangte an la thei mai tawh dawn a ni. SWAN hmang hian data, voice leh video communication te a tih theih a. Vawiina hawnaah Chief Minister hian District dang Deputy Commissioner te chu Video Conferencing a neih pui nghal bawk a ni.

Hawnna inkhawmah hian central sorkar atangin Dr.Rajendra Kumar, Joint Secretary, Department of Electronics and Information Technology pawhin thusawina a nei bawk a. Govt of India atang bawkin NEGD senior officer te an tel bawk a, Mizoram sorkar official thahnem tak an tel bawk.