Vawiin chawhnu dar 1.00 khan Rural Development Minister Pu R. Lalzirliana hovin Mizoram State Rural Livelihood Mission chuan a vawikhatna atan Secretariat Conference Hall, New Capital Complex-ah Governing Body meeting an nei a; he meeting-ah hian Parliamentary Secretary Pu Lalrinmawia Ralte bakah RD Secretary Pu K. Riachho leh Social Welfare Department Secretary Pu T.V. Fambawl leh a kaihhnawih Department Officer-te an tel a ni.
Rural Development Minister Pu R. Lalzirliana chuan National Rural Livelihood Mission (NRLM) nihphung sawifiahin, “Thingtlang miretheite chawikanna tura Central sawrkarin Swarnjayanti Gram Swarojgar Yojana (SGSY) a lo kalpui thin chu changtlung zawk leh huapzau zawkin NRLM hian thlak a ni dawn ta a. Mizoram-ah pawh State Rural Livelihood Mission (SRLM) chu society anga dinfel a lo ni ve ta a; Mizoram-a RD Block zawng zawngte chu a tahtawlin SRLM hian a tuam chhuak vek dawn a ni” a ti. SRLM hlawhtlinna tura a bul tan that tul a tih thu Pu R. Lalzirliana chuan sawiin, “Thingtlang lama kut hnathawka eizawngte tanpuina tur hi scheme hrang hrang kalpui a ni thin a; sum leh pai kan senso nasat ang hu-in hlawhtlinna kan hmu tawk lo fo a. Chuvang chuan, tanpuina dawn hi thingtlang mipuite hian ngai-ah an neih mai a hlauhawm a; SRLM hnuaia hnathawk tute hian mipuite kan cho phur thiam tur a ni a, an hlawhtlinpui ngei theihna turin zirtirna leh kaihhruaina tha kan pe bawk tur a ni” a ti.
State Rural Livelihood Mission chuan a bul tanna atan Kolasib District-a Bilkhawthlir leh Thingdawl RD Block bakah, Serchhip District-a East Lungdar leh Serchhip RD Block- te chu ngawrh takin an thlurbing dawn a; RD Block dangte pawh hemi hun chhung vek hian chak taka scheme hrang hrang kalpui theihna tura buatsaih a ni dawn a ni. Vawiina Governing Body meeting hian kum 2012-13 chhunga SRLM hnathawh tur ruangam siamsa chu a pawmpui bakah, SRLM bul lo tan tawhna – Bihar leh Andra Pradesh State-te tlawh a, an hnathawh dan kalphungte zir chiang turin Parliamentary Secretary Pu Lalrinmawia Ralte hova lam kal intirh chu a remti bawk a ni.
