Vawiin khan Chhim Veng YMA Hall-ah MZP Hqrs Mamit buatsaihin kumin 2012 chhunga HSSLC, HSLC a zirlai hlawhtlingte chawimawina hun neih a ni a. He hun hi Pu Lalsawta, Education Minister, in hman puiin chawimawina thuziak (citation) a hlan.

Hemi puala inkhawm Tv. Lalropuia Treasurer MZP Hqrs Mamit kaihhruaiah thusawiin zirna hi kan rohlu, a nawlpui anga mizoten kan tih theih tlan vek a ni a ti a, Hmun changkang zawkte angin kan ram hian Industry lian leh hmasawnna ruhrel tha kan la neih loh avangin chutiang ang dinchhuaka siam tur chuan thiamna tak tak kan neih a tul a ni a ti bawk. Khuallian chuan zirlai harsa tak tak zira thiam si loh ai chuan kan hman tangkai nghal theih tur zirlai kan zir a tul tawh thu sawiin chutiang zirlaibu kan zir theihna tur chuan Sawrkar in hma a la mek a, 2013 April atang chuan kalpui tan tum a nih thu a tarlang bawk.

Minister chuan Central Sawrkar ruahmanna angin AIEEE kalpui a nih thu sawiin zirna sang zawk bei tura Entrance Exam hrang hrangah pawh pawl 12 finala an Mark 40% dah a nih tawh tur thu a sawi bawk a ni. Khuallian chuan mithiam kan chawimawina hi duh tawk mai lova hmalam pana theihtawp chhuah turin kalkhawmte chu a chah a ni.

Pu James Thanghmingmawia President MZP Gen Hqrs, khualzahawm pawhin zirlai titha te chawimawina hun MZP in a hmang thin hi zirlaite fuihtu leh hlawhtlinna an neih theih nana buatsaih a nih thu a sawi a, Zirlaite pawh tumruhna neia ram leh hnam dinchhuahna tura theihtawpa tan la zel turin a sawm bawk.

C. Laldintluangi Topper HSLC 2012, Pu P.C Lalthanzuala President Joint V/C Mamit leh Pu Laldangliana DEO te pawhin thu an sawi bawk.

He zirlai titha te chawimawina hunah Mamit khawpui chhung atanga HSSLC atangin Zirlai mi 21 leh HSLC atangin zirlai mi 9 te hnenah chawimawina thuziak (citation) leh pawisa fai hlan an ni.

MZP Hqrs Mamit hian Pu Lalsawta Education, Minister leh Pu James Thanghmingmawia President MZP General Hqrs, Aizawl te hnenah chawimawina thuziak an hlan bawk a ni.

Vawiin vek khan Chhim Veng YMA Hall, Mamit-ah Pu Lalsawta, Education Minister chuan Mamit khawpui chhunga zirtirtu zawng zawng te kohkhawmin zirna-in hma a sawn theih dan tur a sawipui.