Chief Minister Pu Lal Thanhawla chu vawiin khan Haryana Niwas, Chandigarh ah Swatchh Bharat Mission (SBM) Sub Group meeting vawi 2-na neih ah a tel. Meeting-ah hian SBM hlawhtlinpui dan tur rawtna engemawzah sawiho a ni.

Chief Minister chuan India hi ram fai ni tura Prime Minister hmalakna chu fakawm tiin lawmthu a sawi a. He faina beihpui kan thlak hi kan tumruhnaah a innghat thui hle dawn a ni a ti a. Mizoram chu zun ram inthiarna lamah kan ziaawm hle tiin, khawlaia daikal hmuh tur kan awm lo a ni a ti a. State sorkarin faina a ngaipawimawh avangin ‘Faina Hapta’ pawh kum 1977 atang khan kumtin kan kalpui thin a ni a ti a. Hei vang hian mipui 80% chuan inthiarna hmun kan nei vek a, 100% ni turin tan kan la chho dawn a, hemi atan hian High Power Committee Chief Secretary kaihhruaina hnuaiah din a ni tawh nghe nghe a ni a ti. Kum 2015-16 chhung atan sum Rs.35 Crore vel kan mamawh tur thu sawiin, Chief Minister chuan hei hi central sorkar-in min tih hlawhtlin sak ngei a beisei thu a sawi a ni. Faina tluantling nei turin mi zawng zawng kan tel vek dawn ani tiin, kumin chhungin district pangnga chu khawlaia daikal awm lohna - Open Defecation Free- ah siam tum a ni a ti.

Chief Minister chuan keini Indian te hian fai kan ngainat hle a hun tawh tiin kan hlawhtlinna tur chu kan zavaia tan tlan a ni a ti.

Meeting hi Andhra Pradesh Chief Minister-in a kaihruai a, Haryana Chief Minister-in meeting-a tel zawng zawngte chu alo mikhual vek bawk a. Meeting-ah hian Maharshtra Chief Minister leh Delhi leh Uttarakhand Minister an tel bawk a, NITI Aayog a CEO te bakah, Central sorkar Ministry hrang hrang ami te an tel bawk a ni.

Vawiin hi Chief Minister Pu Lal Thanhawla pianchamphaphak a ni a, meeting-a tel Chief Minister te leh midang reng rengin lawmpuina chibai an buk bakah pangpar te an hlan a, press conference neihna hmun thlengin a piamchamphaphak hi an sawilang a ni.