Vawiin chawhnu dar 2:30 khan Lunglei Zotlang veng a Social Welfare Department Building leh Mizoram chhim lam Dist 3 tan a Nutrition dahkhawmna tur te Rs. 118.00 lakhs senga sak chu Chief  Minister Pu Lal Thanhawlan a hawng. He Building hi Ground Floor nen chuan chawng li (4) ani a Programme Officer, DSWO leh CDPO te Office bakah Nutrition Godown atan te hman ani ang. Hawnna inkhawm ah hian Social Welfare Minister Pu Pc. Lalthanliana chu khual zahawm niin, Pu S.Laldingliana, Parliamentary Secretary, Pu Joseph Lalhimpuia, HPC Vice Chairman Lunglei, Pu Ranbir Singh, SWD secretary leh Pi Lal Riliani Chief Minister nupui ten Chief Minister hi an tawiawm a ni.

Chief Minister chuan Social Welfare Dept. chu Deptt. pawimawh tak naupang, rualbanlo, tar chaklo leh mi chanhai te enkawltu ani a. A thawktu te pawh miharsa te tanpuina a tuimi leh eirukna laka fihlim an nitur ani a ti. Ram leh hnam tan rawngbawl na chu Pathian rawngbawlna kawng khat ani a, miharsa leh rethei te hmangaih a an rawngbawlsak chu Politics ahmuh dan niin a sawi. He thil hi mitam takin an hmuh thelh avangin Politics hi alo thianghlim lo thin a ni a ti a. Politics chu Pathian in ram rawngbawlna atana min pek anih avangin, mahni in chhek lenna anilova chhung khat laina te vulhna leh hlawkna leh hausakna beisei vanga khelh chi anilo ati. Tuna kan sawrkar na hi a phur awm a inpawh tlang leh tangrual tak a thawkho kan nih avangin a lawmawm hle ani a ti. Ram hruaitu tehi lipse ngam in hna kan thawk a chu chu mipui pawn min hriatpui a tha ang ati bawk.

Thusawitu dang Pu PC Lalthanliana, SWD changtu minister chuan building thar Deptt. puala loding ta chu thil lawm awm tak chhimbial pumpui tana hmasawnna langsar tak ani a. NGO leh mipui vantlang te pawn aneitu chan changa inthlahrung hauhlova dawr thin tur leh SWD hmalakna te thlawp turin a sawm a ni.

Technical report in a tarlan dan chuan he SWD building sakna Rs. 118.00 lakh hi ministry of tribal affairs atanga hmuh a ni. He building ah hian Ground floor 171.57Sq.meters, First floor 281.67Sq. meters. Second floor 458.48 Sq. meters leh Third floor 388.07 Sq. meters te a awm a ni.