No.3625/2020-2020

Aizawl the 30th July, 2020: Chief Minister Pu Zoramthanga chuan vawiin khan Armed Veng 1st MAP Football Ground siamthat a Synthetic Football Turf phahna tur lungphum a phum. He hunah hian Home Minister Pu Lalchamliana leh Sports and Youth Services Minister Pu Robert Romawia Royte te an tel a ni.

Synthetic Football Turf lungphum phumna pual inkhawm tawi buatsaihah Chief Minister Pu Zoramthanga chuan thu sawiin, infiamna khawvela hmasawnna rahbi pawimawh a nih ngei a beisei thu a sawi a. Sports a hmasawnna chu ram leh mipui hmasawnna leh changkanna tehfung pakhat a nih thu sawiin, Mizoramin khawvel huap pawh a lang thei infiammi chhuanawm tak tak a nei belh zel chu a lawm thu a sawi. Chief Minister chuan sports infrastructure, hmasawnna ruhrel siam atangin hmasawnna nasa zawk hmuh belh zel a beisei thu leh, infiamna khawvelah leh thildangah pawh hmasawn zel a, state dangte tana entawn tlakah Mizoram siam chu a ngaihpawimawh thu a sawi. Mizoram Police ta ni thin kha khawtlang ten an hman zel theih tura inremna an siam chu lawmawm a tih thu a sawi bawk.

Chief Minister chuan COVID-19 hrileng in ram pum a tihbuai dan leh Mizoramah pawh hmalakna hnathawh leh sum inrelbawl dan a tihbuai phah thu sawiin, kumin state budget pawh a tul teah chauh indaihlo chungin hman a nih thu a sawi a. Chutihrual chuan central sawrkarin hmasawnna hnathawhna tur a bithliah sa vek, chumi atan pawh sum a pek emaw a dah tawhte chu a nihna turah bak hman theih a nih loh thu a sawi a. Hmalakna tur duan sa chu a hun bi tuk anga hma la ngei tura phut leh beisei kan nih angin sum indaihlohna awm mahse, thildangah hman theih loh thu a sawi.

Home Minister Pu Lalchamliana pawhin he hunah hian thu sawiin, thalaiten infiamna hmun tha tak an nei tur leh, field neitu Mizoram Police leh Sports Council ten inremna fel tak an siam chu lawmawm a tih thu sawiin, sports kawngah Mizoram thalaite tana thui taka hmasawnna thlentu a nih a beisei thu a sawi.

Sports Minister Pu Robert Romawia Royte chuan 1st Bn. MAP Football Ground chu nasa taka cheibawl tum a nih thu sawiin, hun reiloteah Mizoram mai nilo India hmarchhak state infiammi ten tangkai taka hman tura siam tura ruahman a nih thu a sawi a. Sports and Youth Services Department leh Police Department MoU angin Police Department chu a neitu an ni zui zel ang a, a khawtlang miten a thlawn in duh duhin an hman theih tur thu a sawi.

Vawiin inkhawm tawi hi Chief Secretary Pu Lalnunmawia Chuaungo chuan kaihruaiin, Sports Secretary Pu H. Lalengmawia hnen atangin hmalak dan tur tlangpui report ngaihthlak a ni a, DGP Pu S.B.K Singh chuan lawmthu sawiin hun a khar a ni.

1st MAP Football Ground hi Football Stadium puitlinga siamna tur Master Plan siam zawh tawh niin, field thlang lamah RCC Structure Extension a chhawnga siam tur niin, a pumpuia sum ruahman zat chu Rs. 46.35 crores a ni. Mi 5000 vel len theihna tur pavilion/ gallery; bakah basement chhawng li a awm ang a. Basement 1 hi Motor Parking atan ruahman niin, a zau zawng hi 3093 Sq.m tura duan niin lirthei four-wheeler 50 leh two-wheeler 250 dah theih tura ngaih a ni. Basement 2 leh 3 ah hian mi 200 vel riah theihna tur Dormitory, Guest Room, Kitchen, Dining Room, Toilet leh Bathroom-te dah tum a ni a. Basement 4, floor hnuai ber chu Gymnasium Room leh Chokidar Quarters atana ruahman a ni. Artificial Football Turf zau zawng hi a dung 110 mts. leh a vang 74 mts. a ni a. Playing area hi a dung 105 mts. leh a vang 68 mts. a zau tur a ni. Football Ground kual chhuak hian Fencing siam tur a nih bakah, Cement Concrete Paver Block Footpath a ground hual hian siam tel tur a ni a. RCC Pavilion hnuaiah Player Changing Room pahnih (2 nos.) leh Toilet pahnih (2 nos.) siam tel tum a ni bawk.

1st MAP Football Ground-a Synthetic Football Turf (1st Phase) phahna tur atan hian Ministry of Youth Affairs and Sports, Govt. of India hnuaia Khelo India Scheme atangin ni 25/11/2019 khan Rs.500,00,000/-(Rupees Five Hundred Lakhs only) phalsak a ni a. 1st Installment atan Rs. 150,00,000/- (Rupees One Hundred Fifty Lakhs only) dawn nghal niin, Mizoram State Sports Council chuan Restricted Tender Ni 04/02/2020 khan chhuah nghal a ni a. He hna thawk tur hian, SAI hnuaia empanelled contractor Décor India Complete Sports Solution, Guwahati-te thlan niin, Ni 26/02/2020 khan Work Order pek a ni.

Vawiin Synthetic Football Turf lungphum phumnaah hian MLA Pu F. Lalnunmawia, MLA Er.H Lalzirliana, Adviser to CM Pu C. Lalramzauva leh AMC Mayor Pu PC Lalhmingthanga te an tel a ni.

Attachment

  • Loading attachment...