No.3626/2020-2020

Aizawl, the 30th July 2020 : Vawiin khan Taxation Department Auditorium, Commissionerate Building, New Capital Complex ah Taxation Department Officer ten Works Contract chungchangah rampum huapa hnathawh dan enletna leh chak zawka hma lak zel theihna tur leh VAT atanga GST inbanlehna hun kartla chungchanga inzirtirna leh sawihona hun hmangin Workshop an nei.

He workshop hawngtu Pu Kailiana Ralte, Commissioner of State Tax chuan Covid 19 hrileng chhoah ram sum leh pai dinhmun India ram pum huap ang pawhin a tla hniam thu sawiin sorkara sum chhung luttu ber chu Taxation Department an nih angin mipui leh chanchinthar lakhawmtute pawhin an hmalakna an thlithlai reng a ni a ti a. Taxation officer leh staff te chu an hna leh mawhphurhna hi ram dinhmun hriltu a nih avangin thahnemngai takin, dik taka hna an thawh zel a pawimawh thu a sawi. Dan ang taka felfai taka record nen, court hmaa dinchanpui tura record vawn fel a pawimawh thu te, chutih rualin chhiah petu tur ten tha tak leh rilru nuam taka chhiah an chhunluh theihna tura ruahmanna siam a pawimawh thute a tarlang a ni.

Covid 19 avangin rampum huap sum dinhmun a tlakhniam thu tarlangin April thlaa GST atanga chhiah lut chu cheng vaibelchhe 11 a nih laiin July thlaah chuan cheng vaibelchhe 45 zet hmuh a ni, a ti a. Hei hi Taxation Department officer leh staff-te theihtawpa tan lakna rah a ni thu a sawi a. Taxation Department hi Mizoram State tana sum laluttuber a nih avangin thahnemngai taka thawk zel turin Department officer te a sawm a, workshop an neih turah duhsakna a hlan a ni.

He workshop-ah hian VAT atanga GST dan hman inkar hunkartlaa works contract kalpui dan tur chungchangah Pu C. Vanlalchhuana, Dy. Commissioner of State Tax-in presentation a nei a. GST Certificate chungchangah Pu H.T. Mawia, Asst. Commissioner of State Tax-in presentation neiin Suo Moto hmanga registration leh return file zui dan tur chungchangah Pu Lalthachianga, Dy. Commissioner of State Tax-in presentation a nei bawk.

Sawihona hun zau tak leh zawhna leh chhanna hunte hmangin, workshop hi hlawk takin an hmang a ni.