Vawiina Bungbangla bul lung lakna hmuna Taxi accident a thi leh hliam Aizawl Civil Hospital-a thlenpui te chu Chief Minister Pu Lal Thanhawla chuan a hriat veleh hospital-ah hian a tlawh nghal a. Accident a thi Upa Zorammuana (60) leh a motor khalhtu a fapa Zosangliana, Serchhip P&E Veng te ruang Serchhip a phurhna tur motor a ruahman sak nghal a ni. Chief Minister chuan accident chu pawi a tih thu sawiin, mitthi chhungte a tawrhpuizia thu a sawi a ni.

Taxi a chuang ve, Pi Vansangzuali (50), Thingsul khua pawh a hliam tuar lovin hospital ah a thi bawk a. A ruang phurh nan hian Pu R.Lalzirliana, Home Minister chuan motor a ruahman sak bawk a ni. Hliam tuar te hi Serchhip khua mi vek, Nicky Vanlalhriata (6), Lalhlimpuii(17) leh Vanlalmawipuii (36) an ni a, hospital ah enkawl mek an ni. Accident tawkte hi Pu Lalrinmawia Ralte, Parliamentary Secretary pawhin a tlawh bawk a ni.