Vawiin chawhnu dar 1:00 khan Pu D.P. Singh, BSNL Chief General Manager-I, Mizoram, Meghalaya leh Tripura viltu chuan ICT Minister Pu Zodintluanga chu a office-ah a kawm a; he inkawmnaah hian BSNL Deputy General Manager Pu Lalhmachhuana leh ICT Secretary Pu S.S. Garbyal te an tel a ni.

Pu Zodintluanga chuan Mizoram-a BSNL service chu a hmangtu mipuiten an duhkhawp loh thu hrilhin, eizawnna atana internet hmangtute phei chuan harsatna an tawh phah thin thu a sawi a; BSNL hak zauhna tur lam ngaihtuah a nih hmain an service awmsate tha taka chhawr theih tura tihpuitlin chu hna hmasaa neih turin a chah bawk. Pu Zodintluanga chuan Mizoram mipuite chu IT lama mi vengva an nih avangin hmar-chhak state zinga telecommunication-a hmahruaitu leh entawn tur atana Mizoram chu bul tanna atana duhthusam a nih thu te, Mizoram sawrkar pawhin BSNL kut tichak tura theihtawp chhuah a inhuam thu te BSNL Chief General Manager Pu D.P. Singh hi a hrilh a ni. ICT Minister chuan lei-a BSNL-ten cable an phum chu a thuk tawk lo nia sawi thin a nih thu te, cable phumna tura kawngpui laih chhiat fo ngailo tura hmathlir thui tak neia connection tam tak pe thei tur cable phum thin a finthlak thute a sawipui bawk a ni.

Pu D.P. Singh-a pawhin Mizoram-in IT a hman tangkai chhoh dan chu fakawm a tih thu sawiin, lei hnuaia cable phumna tur luikawr hranpa liau liau duan a nih loh avanga kawngpui siam hnain inbiakpawhna a tihsukuk thin dan a sawifiah a. Mizoram sawrkar chu Ministry of Surface Transport hnenah kawngpui sial leh siam project zawng zawngah cable kalna tur luankawr hranpa siamna tur sum ruahman tel thin tura ngenna siam turin Pu Zodintluanga hi thurawn a pe a. Tin, Mizoram-a BSNL hmanga inbiakpawhna a that lehzual theihna turin tuna Mizoram-in cable hmanga signal a lakluhna Aizawl-Silchar-Shillong-Guwahati-Siliguri-Kolkata inthlunzawmna bakah, Kolkata-Dacca-Cox Bazar-Lawngtlai kaltlanga inthlunzawmna siam belh tura Ministry of Telecommunication lama rawtna siam turin a ngen bawk a ni.

Kawngpui dunga telephone hrui phumna tur bik luankawr siam chungchangah Pu Zodintluanga chuan Pu D.P. Singh chu vawiin la la-a a ruangam tur a hnena thehlut turin a hrilh a; Mizoram University thlenga kawngpui siam turah telh hram dan Chief Minister hnena thlen a tum thu a hrilh a ni.