Vawiin chawhnu dar 2.00 khan Aizawl Municipal Council-a MNF, MPC leh ZNP Councillor-ten AMC Councillors’ Welfare hmingin UD&PA Minister Pu Zodintluanga chu a pisa-ah an kawm a. AMC kalphung leh hmachhawp chungchangah an ngaihmawh leh ngaih pawimawhte inpawh takin an sawiho a ni.

Pu Zodintluanga chuan amah kawmtu Councillor-te chu AMC inrelbawl danah opposition rilru pulo turin a ngen a. “AMC hi thil thar a ni a, chuvang chuan mi khawpuia Municipal Council inrelbawl dan ang diak diak chu kan la tlin rih lo a nih pawhin, kalphung nghet atana thalote thlauh thlain, tha zawk leh kan inlungrual tlan theihna ang zawka kan kal chhoh a tha a ni” a ti. AMC Councillor-te chu ruling leh opposition anga rorel lova, dawhkan khat kila engkim sawiho thin turin a ngen bawk a ni.

Vawiina AMC Councillors’ Welfare hminga UD&PA Minister Pu Zodintluanga kawmnaah hian Councillor 9 an tel a; AMC inrelbawlna tur atana sawrkarin dan a siamsakte chu hman theih a peih thuai an duh thu an thlen a. Tin, AMC Councillor-te dinhmun leh hlawh tihchian thuai an duh thu an sawi bawk a ni. Heng an thu thlente hi Pu Zodintluanga chuan chak taka bawhzui mek a nih dan a hrilhfiah a, AMC Dan chelek tur chi hrang hrangte chu Law Department-in uluk taka a bihchian thu hrilhin, “Hmanhmawh avanga Dan pawr tak neih a hlauhawm avangin fimhur taka kalpui a tul a ni” a ti.