3427/2024-2025

Dated Aizawl, the 8th December, 2024: Vawiin chawhnu khan Chief Minister Pu Lalduhoma chuan Sakawrtuichhuna Tawngtai Bethel Camping Centre (TBCC) a tlawh a, an chawhnu inkhawm telpuiin Christmas leh kumthar an lawmna tur cheng nuaih nga (Rs. 5 Lakh) a pe. Pu TBC Lalvenchhunga, bialtu MLA, Adviser to Chief Minister ni bawk chuan Chief Minister hi a tawiawm.

Thu a sawinaah Pu Lalduhoma chuan,  Mizorama home hrang hranga enkawl mek te tan sawrkar chuan buhfai kg khat Rs. 6 anga chhutin thla thum danah quintals 6636 vel a pe chhuak thin a. A man a tlawm em avangin han tihsan hlek a, mihring pek zat tihpun kan rilruk mek. Tuna kan pek mek hi mi 14,788 te tana chhut a ni. Home a enkawl hi tlem tial tial se kan duh laiin an pung tial tial mai si a. Buhfai pek chhuah zat hi tihpun a tul hmel.

He hmuna enkawl mekte hnena ka sawi duh chu thuawihna hlutzia hi a ni tiin thuawihna hlutzia a hrilh a. Home enkawltute thu lo awih ngei turin a chah. Vawiina in nun tha lo sim tura buatsaih mek in ni hi nangmahnia 'a rah lo peng' sahthlakna a ni a. Mahni peng sah thlak chu a nain tawrh a har dawn. Nimahsela, huai takin 'a rah lo peng' hi lo sat thla rawh u. In rah tam lehzualna tur a ni. Mi tha zawk ni tura in inbuatsaihna a ni a. Ram nuam zawk panin thlalerah in thang mek a ni.

In nu leh paten an hmangaih che u tih hi ringhlel ngai suh u. Ramsa leh Sava te pawh hian a note te mahnia ding theia an lo puitlin theih nan - hmun hlauhawma chaw zawng turin an nawr chhuak a, thlawh zir turin hmun sang tak atang tein an thlak thin. Nungchate mahin chutianga an tih chuan kan nu leh pate pawhin kan chungah an ti ang tih i ring ang u. An duh loh che u vangin he hmunah hian an tir lo che u. Mahnia ding thei turin an tuaihriam che u a ni zawk. I beidawn khan a tuar nasa ber tu chu nangmah tho kha a ni. Mihring te hi thil thuhmun kan chunga lo thleng kan dawnsawn dan a inang lo fo. Thenkhatten dam dapa an hmachhawn theih laiin midangin hrehawm ti takin a lo hmachhawn thin. An rilru sukthleng dik loh vang a ni. Rilru hrisel tak pu ula, tuar ula, zawm tur apiang zawm ula, hnehtu ni tawh turin lo chhuak ang che u. Chhungkua leh khawtlang tana mi tangkai tak tak in ni leh thei tih hi ringhlel reng reng suh u, tiin a chah a ni.

Inkhawm kaihruaitu Pu TT Zohmingthanga chuan, kan Chief Minister hian lakluh a nih ni khan, ama ina amah lawmpui tura a unau pungkhawm te pawh thlahlel zo lovin he hmun tlawm tak hi a rawn pan hmasa a. Kha a thiltih kha kan theihnghilh thei tawh lo. Christmas thilpek kengin ka lo kal leh dawn e a tih ang ngeiin vawiinah a hmel kan hmu leh ta. A chungah kan lawma Pathianin a hmang a ni tih hi kan chiang a ni, a ti.

Pu TT Zohmingthanga leh a nupui Pi K L Hmangaihzuali ten rinna behchhana an enkawl, ruihhlo ngaite enkawlna hmun, TBCC ah hian mi 1270 vel an awm mek a, Chief Minister Pu Lalduhoma hian Chief Minister atana lakluh a nih ni, December ni 8, 2023 khan ama chenna in pawh a pan hmain a lo zuk tlawh tawh a. Vawiin, a kum khat cham, December ni 8 hian a tlawh leh ta a ni. Christmas leh kumthar hmanna tur pawisa a pek avang hian an lo lawm hle.