3428/2024-2025

Dated Hnahthial, the 9th December, 2024: December ni 9, 2024 atanga December ni 13, 2024 thleng awh tur - " No Tolerance Week, 2024" hawnna chu vawiin khan Hnahthial Bazar veng kawnah neih a ni a. He hunah hian Hnahthial SP, Pu Shivam Siddarth chuan khuallian niin a hmanpui a. Pu Lalhmangaihhlua, Addl SP chuan he hun hi a kaihruai bawk a ni. December ni 9 atanga ni 21 thleng hi Bazar kawn tual zawh chu sumdawngte inphona tur atana tih anih avangin lirthei eng chi mah dah phal a ni lo a ni.

SP, Pu Shivam Siddharth chuan "No Tolerance Week" hman anih chhan chu mipuite khuahkhirh tum ai mah chuan mipuite traffic chungchanga an fimkhur a, an him zawk theih nan an nih thu a sawi a. Kum tin traffic accident vangin mi sang chuangin nunna an chan thin thu sawiin chumi chhan lian tak pakhat chu inhrilhhriatna tha a awm loh vang anih thu a sawi a. Chumi vang tak chuan he hun hi buatsaih an nih thu sawiin Hnahthial mipuite chu lirtheia an veivahna kawngah an him zawk theih nan traffic dan leh dun tha taka zawm turin a sawm nghal a ni.

Hun kaihruaitu Addl SP, Pu Lalhmangaihhlua chuan No Tolerance week, tun kar chhunga hman tur chu mipuiten ngai pawimawh se a duh thu a sawi a. Rui chunga lirthei khalh leh kum tling lova lirthei khalhte chu an ngaih thutak lehzual tur thu sawiin rui chunga lirthei khalh te ngat phei chu fine tir an nih mai bakah an licence suspend tura hmalak mek anih thu a sawi a. No Tolerance Week hlawhtling taka hman anih theih nan kalkhawm zawng zawngte thawhpuiah a sawm nghal bawk a ni.

SDO Sadar, Pi Esther Leihang chuan kutpui vuakvetah lirthei chetsualna a tam thu sawiin mipuite chu fimkhur tlang tura a duh thu a sawi a. Hnahthial chu kawng a tet avangin mitinin mahni motor park-na hmun te uluk a, District nihna chu a hming mai ni lovin lirthei khalh leh hun danah pawh a lang tur a ni a ti bawk.

He huna kalkhawm Sub Hqrs YMA te, khawtlang hruaitute, thuthar lakkhawmte leh tlawmngai pawl hrang hrangte hnen atangin No Tolerance Week chungchanga an vei zawngte ngaihthlakna hun neih anih hnuin he hun hi khar a ni.