3429/2024-2025

Khawzawl, dated 9th December 2024: Vawiin chawhma dar 10 khan Multipurpose Hall, Govt. Khawzawl College-ah Nehru Yuva Kendra (NYK) Champhai leh Govt. Khawzawl College bultumin Youth Festival (Yuva Utsav) huaihawt a ni a, Khawzawl Superintendent of Police, Pu F. Lalbiakzauva chu khuallian niin hun a hmanpui a ni.

Khuallian Pu F. Lalbiakzauva chuan hetiang hun pawimawh tak thalaite tana buatsaih a ni hi tha a tih hle thu a sawi a, zirlaite ram hmangaihna neih phaha mahni theihna leh thiamna ram tana hmang tangkai ngei turin a sawm a. Chhungkua enkawla khaidingtu ni theih nana nun uluk turin a fuih a, social media hi thil tangkai leh thil tha atana hmang turin a chah a ni. Ruihhlo, mipat hmeichhiatna leh awhna sual laka fihlim turin zirlaite a chah bawk a, zirna leh hnathawhnaa taimakna chhuah zel turin a fuih bawk a ni.

He hunah hian Pi Lalramlawmi, Asst. Professor chuan hun a kaihruai a, Pi Lalruatmawii, Principal chuan welcome speech sawiin khuallian te, zirlai te leh mi sawm dang te a lo lawm a ni. Pu K. Hmingthanga, NYK Team Champhai chuan NYK thiltum leh awmzia a sawi a, zirlai hnen atangin thusawi (public declamation) leh hla chham (poetry reading) ngaihthlak a ni bawk. Zuchhip Branch YMA leh NYK Competition te'n cultural item an hmuh bawk a ni. Chawhnuah hian intihhlimna hun hman a ni bawk a, zaithiam leh lamthiam hrang hrang sawm an ni.

Youth Festival hi Ministry of Youth Affairs, Govt. of India hmalakna a ni a, thalaite'n ram hmangaihna an neih zawk nan te, khawtlang leh ram tana thawh chakna an neih nan te leh harsatna hrang hrang su kiangtu an nih theih nan te a huaihawt a ni a, inzirtirna leh infuihna bakah intihhlimna hun hman thin a ni.