Nimin khan Chief Minister Pu Lal Thanhawla chuan Hmarchhak state a tourism leh a hmunhma te tih hmasawn leh thuam nan a Sawrkar Laipui ruahmanna thar Swadesh Darshan North East Circuit hnuaia Mizorama project hmasa ber leh lian ber tur 'Integrated Development of New Eco-Tourism' tih chu Thenzawl Community Hall ah a lung phum a phum a. Chief Minister hi Pi Lal Riliani; Tourism Minister Pu John Rotluangliana leh Parliamentary Secretary Pu TT Zothansanga ten an tawiawm a. He project hnuaiah hian Thenzawl, South Zote leh Reiek ah te khualzin hipna tur hmun hma hrang hrangte buatsaih a ni dawn a ni.

He project lungphum phumna puala inkhawm Community Hall, Thenzawl a neihah thu sawiin Chief Minister Pu Lal Thanhawla chuan hmasawnna lo luang lut tur kan dawnsawn thiama, dawl zo tur chuan kan rilru sukthlek te, kan rilru leh ngaihtuahna te inbuatsaih a tul a, thil ropui kan beisei chuan rilru zau tak kan put thiam a tul a ni, a ti a. Tourism project thar peihfel anih hunah chuan khawvel leh ramchhung hmun hrang hrang atangin khualzin an lo kal dawn a, faina leh thianghlimna kawngah te, ei leh in, rawngbawl kawngah te, hawihhawmna lamah te kan inzir a, nasa taka tan kan lak a ngai dawn a ni, a ti a. Chutiang dawngsawng thiama, an rilru leh ngaihtuahna te inbuatsaih leh inpuahchah turin Thenzawl mipuite a chah a. Malsawm zel tlak a khawsa thei tur chuan lawm chunga Pathian rawngbawl a tul a, kan phak chin chin ah Kristian rim tak niin mite tan malsawmna ni turin kan inpek a ngai a, chu chuan Pathian malsawmna tam zawk kan tawng baw thei dawn a ni, a ti.

Pu Lal Thanhawla chuan Thenzawl leh a chheh velah Khuanu siam thil mawi tak Vantawng Khawhthla, Tuirihiau, Chawngchilhi Puk te bakah hnam rohlu ang thil dang tam tak a awm thu sawiin, heng thil te hi tourism industry atan chuan mite hipna tha tak mai a ni a, a vawnhim nachang kan hriata kan humhalh a pawimawh a ni, a ti a. Heng thil te hi khualzin te chuan Pathianin a siam dan ang chiahin hmuh an duh a, a tir atanga a awm dan ang chiaha kan dah hian kan ti hlu leh zual a, mite enchak leh tlawhchak in kan siam a. Heng thil thenkhat te hi kawng pawh tir kan tumna leh kan cheithat tumna lamah a hlutna ka ti bo mek a, hmuhtlak lova kan siam a hlauhawm a ni, a ti bawk.

Chief Minister chuan Kolkata Salt Lake a Mizoram House leh Lengpui Airport te sak laiin mi thenkhatin an sawisel a mahse tunah chuan hengte hi nasa takin mipuiin kan chhawr tawh a ni tiin he Tourism project pawh hi ram mipuiin hun lokal zel turah nasa taka an tangkaipui leh an chhawr a beisei thu a sawi a. Sum ngainatna chu sual tin reng bul a ni tih sawiin chu chuan mihring chu duhamnaah a hruai lut a, chumi ina a hrinchhuah chu kuttling lova sum lak luh pawisak lohna a ni tiin kuttling lova sum lak luh pawisa loten Mizoram hmasawnna an ti thuanawpin harsatna an siam mek thu a sawi a. Hetiang mite avangin Asia chhim chhak nena insumdawn tawnna kawng, Burma ram katlanga Sittwe lawngchawlh hmun pawhna tur te leh Sairang thleng tur rel kawng sial mek te tihkhawtlaia a awm thu a sawi bawk.

Tourism Minister Pu John Rotluangliana chuan hetianga tourism project lian hi Mizoram khawi khuaah mah a la thleng ngai lova chuvangin Thenzawl mai ni lo Mizoram pum tan ni hriatreng tlak a ni a, Thenzawl mipuite hi in vannei hle a ni a ti a. Thenzawl mipuite chu an rilru ti danglama, ti thar tura chahin, he hmasawnna hi kawng tinrenga tihhlawhtlin anih theih nan theihtawp chhuahpui turin mipuite a sawm bawk.

Programme hmanpuitu dang Rajya Sabha MP Pu Ronald Sapa Tlau chuan he project ina a ken tel Golf Course chu hun rei tak atanga Chief Minister suangtuahna anih thu sawiin a taka he thil lo thleng hi a ropuiin a lawmawm takzet a ni, a ti a. Golf Course leh tourism hmun hma dang buatsaih turin mipui tan eizawnna kawng tam tak a hawn ngei a beisei thu a sawi bawk.

He Tourism project lungphum phumna programme kaihruaitu Parliamentary Secretary Pu TT Zothansanga chuan Mizoram hi ramchhung leh rampawn khualzin ten an hriat chhoh mek thusawiin tourism hian nasa zawkin Mizoramah kawng hrang hrangin hmasawnna a thlen dawn a ni, a ti.

He hun hi Pu V Lalremthanga, Tourism Secretary chuan lawmthu sawiin a khar a. Programme ah hian Tourism Department, khawtlang hruaitu, tlawmngai pawl hruaitu leh Thenzawl mipui thahnem tak an tel a ni.

Swadesh Darshan hnuaia Integrated Development of New Eco-Tourism Project kaltlang hian Thenzawlah Golf Course puitling 18 Hole Golf Course te, Convention Centre changtlung tak te siam a ni dawn a. South Zote ah eco-tourism hawi zawngin Eco Log Cluster Cottage Cluster changkang tak siam a ni dawn a. Reiek ah khualzin te hipna leh an hlut tur ang chi Rapelling te, Zip Line te, Body Zorbing, Rope Course leh Archery hmunhma te buatsaih a ni dawn bawk a ni.

He Project pumpui hi cheng vaibelchhe 94 hu niin Project Consultant hi Fore Consultants Private Limited, New Delhi an ni.

Attachment

  • Loading attachment...