AH & Vety Minister Pu C. Ngunlianchunga chuan vawiin chawhnu khan Serkhan khua a Serkhan ‘A’ Milk Producers’ Cooperative Society Milk Collection Center-a Bawnghnute Litre 1000 dahkhawlna (Bulk Milk Cooler) hawnna hun a hmang. He hunah hian Parliamentary Secretary Pu Hmingdailova Khiangte chu khualzahawm niin, Parliamentary Secretary Pu H. Zothangliana'n Minister hi a tawiawm bawk.

Khuallian Vety Minister chuan Serkhan chhungkaw 180 bawr vel awmnaa chhungkaw 60 vel bawng vulh a eizawng awm ten bawnghnute an tharchhuah a tam avanga an mamawhna ang ngei Bulk Milk Cooler hun sak an nih thu a sawi a. Hei hian Serkhan khaw mipui taimakna leh thahnemmgaihna bakah Sorkarin kuthnathawktute hma a ngaihven zia a tilang ani, a ti a.  Kuthnathawktute hmasawnna tur leh tihzangkhai dan ngaihtuah chu Sorkar thil tum a nih thu sawiin, thawk tha leh taima apiang chu duhsak an nih tur thu leh, mi thenkhatah thawk mang lova pawisa lakluh duhna rilru awm thin chu hmasawnna daltu anih thu a sawi a ni.

Khualzahawm Pu Hmingdailova Khiangte chuan vawiina bawnghnute dahthatna hawn chu society member leh khawtlangin an chhawr tangkai a beisei thu sawiin, a enkawlzui kawngah pawh neitu nihna chan chang thiam tura a duh thu a sawi a. Sorkar chuan kawng engkimah a theih leh remchan dan apiangin kuthnathawktute hmasawnna turin hma a lak thin thu sawiin, chutihrual chuan an khaw hmasawnna leh than nana mawhphurtu tluantling putu chu a khaw mipuite an ni tih vawng reng turin kalkhawmte chu a chah a ni. Parliamentary Secretary chuan Serkhan ‘A’ Milk Producers’ Cooperative Society chu NLUP Dairy beneficiary intelkhawm in an din anih thu a sawiin, an hmalakna chu fakawm a tih thu a sawi bawk.

Bulk Milk Cooler hawnna hun hi Pu Vanlalchhunga, Chairman, MULCO chuan kaihruaiin, Dr.Lalremliana, Managing Director chuan report a pek bakah bawnghnute vawn thianghlim chungchanga hriattur pawimawh te a sawi tel a. President, Village Council, Serkhan leh Chairman, Serkhan 'A' MPCS ten thu an sawi bawk a ni.

He Bawnghnute dahkhawlna (Bulk Milk Cooler) hi bawnghnute sawrhlim, a sawngbawlna hmun thlenpui hmaa a chhiat mai loh nana Io dah khawlna leh dah vawhna a ni a. He khawl hian bawnghnute hi 4°C aia sang Iovah vawng daiin a vawng tha thin a, hei hi a phurhna tur bik motor (Road Milk Tanker) hmangin Mulco Dairy Plant a phurh thlen thin a ni. Bulk Milk Cooler hi Indian Dairy Machinery Company Ltd. (IDMC) siam niin, Power Supply awm loh huna hman turin Diesel Generator 10 KVA a keng tel bawk a ni.