Vawiin khan Govt. Saitual College Silver Jubilee Hall ah MZP Headquarters, Saitual bultumin Mizoram Board of School Education in kumina HSLC leh HSSLC exam a buatsaih a Saitual Town Area a Higher Secondary School leh High School atanga zirlai First Division leh a chunglam a pass chin leh Saitual khaw mi leh sa hmun danga lehkha zir First Division leh a chung lam a pass mi 58 chawimawi an ni a, he hun hi bialtu MLA, Home Minister ni bawk Pu R.Lalzirliana chuan khuallian niin a hmanpui a, Saitual Town Area a sawrkar hnathawkte, zirna In hrang hrang hotute, khawtlang hruaitute leh tlawmngai pawl aiawhten he hun hi an hmanpui bawk a ni.

Zirlai tithate fuihna thu sawiin khuallian chuan khawvelah hian dinhmun ngai rengin kan awm thin lova, Pathian kan tih a theihtawp kan chhuah chuan kan tana tha tur leh kan nihna awm takah min dah thin a ni a ti a, MZP ten zirlai titha chawimawina hun an buatsaih chu an tih awm tak an ti ani tiin an mawhphurhna piah lama an inrawlh hian zirlaite nungchang leh sukthlek tichhe theitu an ni ve thei tho ani tih hria a hmathlir thui tak leh thuhnu dawn thiam turin kalkhawmte a chah bawk. Hlawhtlinna kawng a awlsam loh thu sawiin awlsam taka hawhtlin tumte zingah tluang ve deuh purh ang a lan chang a awm thin a, mahse a tluantling tak tak thin lo a ti a belhchiandawl leh belhchiantlak ni tura thiamna neih a pawimawh a, mahni thawh rah ngei seng hi a nuamin a hahdamthlak a ni a ti bawk.

Home Minister chuan Sawrkar hna lak chungchangah Sawrkarin "merit" a ngaipawimawh in a dahpawimawhber tih sawiin a thiam leh a tling tawk na na na chu tuman an thik thei lovang a ti a, zirlaite chu thahnemngai taka zir tura fuihin Mizo tawng sawi leh ziak dan dik kan zir thar a tul hle tawh a, hemi tur hian lehkhabu chhiar uar a pawimawh ani tiin Mizo tawng mai bakah Sap tawng leh Vai tawng pawh thiam ngei ngei tum turin zirlaite a chah a ni. Home Minister hian Saitual khelmual chu phullem phah thuai anih tur thu leh Keifang khelmual pawh phullem phah anih ve ngei theih nan ruahmanna siam mek anih thu a sawi a, Keifang Higher Secondary School leh Rulchawm Higher Secondary School chu khawtlang hruaitute nen uluk taka an sawiho hnu ah inchhunfin an remtih thu leh School thar sakna hmun tur pawh lungrual taka an ruahman thu sawiin a bul tanna turin MLA Fund atang pawisa Rs nuai 10 a pek dawn thu a sawi bawk a ni.

Vawiina MZP buatsaih a HSLC leh HSSLC exam titha chawimawina ah hian HSLC exam a Distinction a pass 11 leh First Division a pass 23, HSSLC Exam a Distinction a pass 4 leh First Division a pass 20 an vaiin zirlai 58 hnenah chawimawina thuziak, pen leh pawisa hlan an ni a, an zing ami HSLC Exam a Mizoram puma 8-na dinhmun hauhtu Lalruatdika Renthlei s/o Donny Lalruatsanga, Home Mission School leh HSSLC (Arts) Exam a Mizoram puma 9-na dinhmun hauhtu Lalrindika s/o Lalengmawia Ralte, Keifang Higher Secondary School te hnenah khuallian hian ama kut chhuak lawmpuina thuziak leh Tablet a hlan ve ve bawk a ni.

Vawiin zirlai titha chawimawina inkhawm hi Pu F. Lalnuntluanga, President, MZP Saitual Hqrs. in kaihruaiin Pu C. Lalchhandama, Joint Secretary, MZP, Saitual Hqrs. in inlawmna thu a sawi a, Pu PC Lalthansanga, Secretary, MZP, Saitual Hqrs. hnen atang report ngaihthlak anih bakah Pi R. Lalrinkimi, Treasurer, MZP Saitual Hqrs. in lawmthu sawina in hnu a khar a ni.