Vawiin (7.6.2016) chhun dar 12 khan School Education Directorate Conference Hall, Aizawl-ah Mizoram SSA Mission leh Central YMA ten School Education Minister Pu H.Rohluna leh Parliamentary Secretary Pu Joseph Lalhimpuia te hriatpuiin zirna kawnga thawhdunna tur thuthlung an ziak.

School Education Parliamentary Secretary Pu Joseph Lalhimpuia kaihhruai he thuthlung ziah inkhawmah hian School Education Minister Pu H.Rohluna chuan thusawiin Central YMA nena thawhhona neih a ni leh ta chu lawmawm a tih thu a sawi a, zirna kawngah hnam anga chhutin Mizote chu a tangrual ber zinga mi kan nih a rinawm thu a sawi bawk. Pu H.Rohluna chuan a tak taka hma kan lak zel chuan thawhhona thuthlungte chu ramin hma a sawnpui ngei a beisei thu a sawi a. YMA chu ziak leh chhiar lamah pawh nasa taka lo thawk tawh an ni tih sawiin SSA nena thawhdunna han neih leh chu beiseina sang tak a neih thu a sawi bawk.

He thawhdunna thuthlungah hian SSA aiawhin School Education Secretary leh State Mission Director ni bawk Pu P.Lalchhuanga’n hming a ziak a, Central YMA aiawhin Pu Lalbiakzuala President CYMA in a ziak thung a, School Education Minister Pu H.Rohluna leh Parliamentary Secretary Pu Joseph Lalhimpuia te hriatpuitu-ah an tang a ni.

SSA State Project Director Pu Lalhmachhuana chuan thusawiin YMA nena an thawhdunna chu a kum 11-na a ni a, hlawhtlinna tam tak hmuh a nih tawh thu a sawi a, tun tuma an thawhdunna turah hian kum 6-14 inkar school lut lo naupang dapchhuah leh school an luh theih nana hmalak te, khawtlangah zirna boruak tha a awm theih nana tan lak leh naupangte hnam ziarang pho lang thei zirtir tihte chu an thawhdunna langsar tur a nih thu a sawi a. Kum 10 liam taah khan Mizoram-ah school lut lo naupang 26000 chuang an awm a, tunah erawhchuan YMA nena an thawhdun azarah school lut lo chu an tlakhniam hle tawh thu a sawi bawk. Central YMA General Secretary Pu Lalhmachhuana pawhin thu sawiin SSA nena an thawhdunna atangin a tirah ziak leh chhiar thiam lo dapchhuah hna an thawk a, tunah hian awareness lamah tan an lak thu a sawi a, Branch thenkhat chuan school chei that thlenga hma an lak thu leh faina kawngah te hma an lak thu a sawi bawk.

He thuthlung ziah inkhawmah hian School Education Minister leh Parliamentary Secretary te bakah School Education Department Director leh officer pawimawh te an tel a, Central YMA Office Bearer te leh Education Cell-a member-te an tel bawk.